Astanada ótken «Ádilet organdary keńes beredi» aktsııasy óz jemisin berdi
ASTANA. QazAqparat - «Ádilet organdary keńes beredi» atty respýblıkalyq aktsııasy sheńberinde Astana qalasy Ádilet departamentimen 12-14 naýryz aralyǵynda tegin quqyqtyq keńes berý maqsatynda halyqpen kezdesýler ótkizildi, dep habarlaıdy departamenttiń baspasóz qyzmetinen.
Aktsııanyń negizgi maqsaty - zeınetkerlerge, múgedekterge, jetim balalarǵa, kóp balaly otbasylarǵa jáne basqa da azamattarǵa quqyqtyq keńes berýmen qoldaý kórsetý boldy.
Sondaı-aq, osy is-shara jemisti jáne nátıjeli ótkizilýi úshin quramynda Departament pen onyń qurylymdyq bólimsheleriniń bilikti qyzmetkerleri, sot oryndaýshylary, Astananyń notarıýstary men advokattary, sondaı-aq «Jyljymaıtyn múlik jónindegi ortalyq», qalalyq ІІD kóshi-qon polıtsııasy basqarmasy, Jumyspen qamtý jáne áleýmettik baǵdarlamalar basqarmasy, Turǵyn úı basqarmasy ókilderi jáne t.b. quralǵan aqparattyq-nasıhattyq toby quryldy.
Aktsııa úsh kezeń boıynsha ótti: birinshi kúni Kúıgenjar kentiniń turǵyndaryna, sodan keıin Almaty aýdanynyń №2 HQKO-da «Ashyq esik kúnderi» ótkizildi. Ekinshi kúni ETs-166/22 memlekettik mekemesinde jazasyn óteýshilerge jáne Astana qalasynyń kásibı-tehnıkalyq kolledjiniń stýdentteri men oqytýshylar quramyna keńes berý kezdesýleri men ujymdyq shyǵýlar uıymdastyryldy.
Úsh kúndik aktsııanyń sońy aǵymdaǵy jyldyń 14 naýryzynda «Nur Otan» HDP Astana qalalyq fılıalynyń qoǵamdyq qabyldaýynda azamattardy qabyldaýmen jáne Astana qalasyndaǵy Ádilet departamentiniń ǵımaratynda qala turǵyndary men jas jubaılarǵa «Ashyq esik kúnin» ótkizý arqyly óz máresine jetti.
Aktsııaǵa qatysýshy azamattar aqparattyq-nasıhattyq toptan ózderiniń suraqtary boıynsha zańǵa jáne óz quqyqtaryn qorǵaýǵa qatysty keńes alǵandaryna rızylyǵyn bildirip, osyndaı tegin kásibı zańgerlik keńes jáne quqyqtyq túsindirý jumystaryn júrgizgenderge alǵystaryn aıtty.
Esterińizge sala keteıik, elorda turǵyndary Ádilet organdary quzyreti shegine kiretin suraqtaryna jaýapty Astana qalasy Ádilet departamentiniń www.adilet-astana.gov.kz resmı ǵalamtorynyń betinen ala alady.
