Astanada ótip jatqan aralas jekpe-jekte ıspandyq sportshy tóbeles aldynda qashyp ketti
ASTANA. QazAqparat - Keshe aralas jekpe-jek jankúıerleri kópten kútken M-1 Challenge 48 týrnırindegi Pavel Vıtrýk pen Agoneı Romeronyń arasyndaǵy tóbelesti kóre almaı, onyń nege bolmaǵanyn túsine almaı álek boldy. Mundaı jaǵdaı M-1 Global týrıniniń 16 jyldyq tájirıbesinde birinshi ret bolyp tur - arenaǵa shyǵaıyn dep turǵan ıspandyq sportshy jeme-jemge kelgende qashyp ketti, dep habarlaıdy mixfight.ru.
Vıtrýkpen jekpe-jekke shyǵýǵa ózi kelisim bergen, kelisim shartqa óz qolymen qol qoıǵan, Qazaqstanǵa óz erkimen kelgen Romero barlyq sportshylardyń arenaǵa shyǵýyna 10 mınýt qalǵanda joq bolyp ketti. Qonaqúıden shyǵyp, bapkerlerden jasyrynyp, telefonyn da óshirip tastapty.
Beıtanys elde adasyp ketken shyǵar degen qaýippen sportshyny izdeýge birden polıtsııa kiristi. Biraq odan da dym shyqpady. Bapkeri Ispanııadaǵy týǵan-týystaryna da habarlasty, biraq ol jaqtaǵylar da beıhabar. Áıteýir túngi úshter shamasynda ol áýejaıdan tabyldy. Onda jaıaý jetip, sol jerden Ispanııaǵa ushyp ketpek bolǵan eken. Alaıda óziniń bul qylyǵyn aýyr psıhologııalyq jaǵdaıda turǵan sportshy túsindire almady. Ispandyq komandanyń bapkeri mundaı jaǵdaıǵa birinshi ret tap bolyp turǵanyn aıtty. M-1 Global kompanııasy qyzý tóbeles uıymdastyrý úshin bar kúshin saldy, alaıda Reseıde eki márte jeńiske jetken Romero bul joly tóbeleske shyǵar aldynda qashyp ketetinin kim bilipti.
