Astanada ótetin jármeńkege Qyzylorda men Atyraý oblystary 600 tonnadan astam ónim jetkizedi
ASTANA. KAZINFORM – Astanada 19 qyrkúıekten bastap óńirlerdegi taýar óndirýshilerdiń qatysýymen aýyl sharýashylyǵy ónimderiniń jármeńkeleri bastalady.
Jármeńke ár apta saıyn senbi jáne jeksenbi kúnderi 1 qarashaǵa deıin ótedi.
Osy demalys kúnderi, ıaǵnı 19 jáne 20 qyrkúıekte elordada Qyzylorda jáne Atyraý oblystarynyń alǵashqy aýyl sharýashylyǵy jármeńkesi ótedi.
Sharýalar turǵyndarǵa et, balyq, sút jáne t.b. ónimderdiń keń túrin tikeleı usynady. Bul azyq-túliktiń qoljetimdiligin arttyryp qana qoımaı, otandyq taýar óndirýshilerdi qoldaýǵa múmkindik beredi.
Atap aıtqanda, Qyzylorda jáne Atyraý oblystary Astanaǵa 600 tonnadan astam ónim ákeledi. Onyń ishinde 260 tonna baqsha ónimderi, 220 tonna kúrish, 65 tonna balyq, 40 tonna et jáne et ónimderi, sondaı-aq 20 tonnadan astam ózge de azyq-túlik bar.
Jármeńke «Qazanat» ıppodromynyń avtoturaǵynda, Qarqaraly tasjoly, 1 mekenjaıynda ótedi.
Elorda turǵyndary men qonaqtaryna jármeńkege barýǵa yńǵaıly bolýy úshin ótetin kúnderi №18, 37 jáne 303 avtobýs baǵyttary qatynaıdy.
Aýyl sharýashylyǵy jármeńkesi saǵat 09:00-den 18:00-ge deıin jumys isteıdi.
