Astanada ótetin World Athletics Indoor Tour Gold týrnıri týraly ne bilemiz
ASTANA. KAZINFORM - Jaqynda Astanada álemdik jeńil atletıkanyń juldyzdary jınalady. Bul týraly Ulttyq olımpıadalyq komıtet málim etti.
Olar qysqy maýsymda erekshe oryn alatyn bedeldi jarystardyń biri World Athletics Indoor Tour Gold serııasynyń kezeńinde óner kórsetedi.
World Athletics Indoor Tour Gold – bul 2016 jyldan beri ótkizilip kele jatqan jeńil atletıka boıynsha joǵary deńgeıdegi qysqy jarystar serııasy. Atalmysh doda jyl saıyn álemniń eń úzdik sportshylaryn jınaıdy. Ol jazǵy maýsymda ótetin «Gaýhar lıgaǵa» uqsas. Týrnır – álemdik chempıonatqa irikteý, reıtıngtik upaı jınaý, rekordtar ornatý jáne júlde alý múmkindigin beretin tolyqqandy sporttyq oqıǵa.
Bul kezeńderde básekelestik óte joǵary. World Athletics Indoor Tour Gold serııasy halyqaralyq kúntizbedegi álemdik deńgeıdegi jarystardyń bastamasy. Árıne, barlyq kezeńde qatysýshylar quramy birdeı emes. Sportshylar ózderiniń daıyndyq kestesine sáıkes eń qolaıly jarystardy tańdaıdy.
Elordadaǵy týrnır Astana Indoor Meet for Amin Tuyakov Prizes ataýymen ótedi. Ol World Athletics Indoor Tour Gold serııasynyń toǵyz josparlanǵan kezeńniń alǵashqysy bolmaq. Qazaqstannan keıin bul doda Belgradta (Serbııa), Bostonda (AQSh), Ostravda (Chehııa), Karlsrýede (Germanııa), Nıý-Iorkte (AQSh), Levende (Frantsııa), Torýnda (Polsha) jáne Madrıdte (Ispanııa) ótedi.
Ár kezeńde sportshylar óz ónerleri úshin upaı jınaıdy. Osylaısha, barlyq kezeń aıaqtalǵan soń, óz dıstsıplınasynda eń kóp upaı jınaǵan sportshylar jeńimpaz atanady. Bıylǵy World Athletics Indoor Tour Gold jarysynda jeńiske jetken jeńil atletter 21-23 naýryzda Qytaıdyń Nankın qalasynda ótetin jabyq keshendegi álem chempıonatyna qatysýǵa arnalǵan Wildcard ıelený múmkindigine ıe bolady.
Qazaqstan astanasy bul jarysty tarıhta ekinshi ret qabyldamaq. World Athletics Indoor Tour Gold kezeńi alǵash ret Astanada 2024 jyly ótip, álemdik elıtalyq týrdyń bir bóligine aınaldy. Sol jyly basty juldyz retinde shved sportshysy Arman Dıýplantıs tanyldy. «Mondo» laqap atymen tanymal, syryqpen sekirýden óner kórsetetin bul sportshy 25 jasynda eki Olımpıada, tórt álem chempıonatyn (ekeýi jabyq keshende) jeńip alyp, on álemdik rekord ornatqan.
Bıyl ol Astanaǵa kelmeıdi.Biraq aldaǵy jarysqa qatysýshylardyń tizimi áli de myqty atletterge toly bolmaq. Olardyń qatarynda kanadalyq Andre De Grass bar. Bul sportshy ıamaıkalyq Ýseın Boltpen sońǵy Olımpıadasynda baq synasqan. 2016 jyly Rıo Olımpıadasynyń 200 metrge júgirýden jartylaı fınalda Bolt pen De Grass máre syzyǵynda bir-birine kúlimdep, kórermenderdi tánti etken erekshe sátti syılady. Bul oqıǵa keńinen tarap, kóptegen vıdeo men sýretke arqaý bolǵan. Nátıjesinde Ýseın Bolt jeńimpaz atanǵan edi.
Andre De Grass jeńil atletıkadaǵy baı mansabymen tanymal. Onyń qorjynynda eki altyn, eki kúmis jáne úsh qola Olımpıada medali bar. Sondaı-aq, ol álem chempıonatynda jeńiske jetip, bir ret kúmis jáne úsh ret qola júldeger atanǵan. Aıta ketý kerek, De Grass Astanada ekinshi ret jarysqa qatysqaly otyr. Ótken maýsymda ol elordanyń qatal aýaraıyna tánti bolǵan edi.
– Jańa ǵana Astanaǵa qondym. Mundaı sýyqqa saı keletin jaqsy kúrteshe tańdaǵanyma qýanyshtymyn, – dep bólisken edi.
Alaıda De Grass jeńiske jete almady. Ol 60 metr qashyqtyqta altynshy orynmen shekteldi. Bıyl kanadalyq sportshynyń basty qarsylastarynyń biri ıamaıkalyq Kısheın Tompson bolmaq. Jas jelaıaq Parıj Olımpıadasynda 100 metr qashyqtyqta kúmis medal alyp, bolashaǵynan úmit kúttirer sportshylardyń qataryna endi. Bul jarysta Tompson óz áleýetin tolyqtaı asha alady degen úmit bar.
400 metrge júgirýde jarys jolyna brıtandyq Aleks Heıdok-Ýılson shyǵady. Onyń basty jetistigi – 2024 jylǵy Olımpıada oıyndarynda eki qola medal jeńip alýy. Sonymen qatar, ol álem chempıonatynda úshinshi oryn alǵan.
Sekirý kezeńinde kórermenderdiń nazary amerıkalyq Markız Dendıge aýmaq. Jabyq keshendegi álem chempıonatynyń altyn jáne qola júldegeri bul joly uzyndyqqa sekirýde baq synaıdy.
Týrnır Kenııadan kelgen «patshalarsyz» ótpeıdi. 1500 metr qashyqtyqta birinshi oryn úshin Kornelıýs Týveı talasatyn bolady.
Áıelder arasynda erekshe kózge túsetin sportshylardyń biri – ıAmaıka sportshysy Natasha Morrıson. Ol Astanaǵa Olımpıada chempıony, álem chempıonatynyń eki dúrkin jeńimpazy jáne eki dúrkin júldegeri mártebesinde keledi. Ol 60 metrge júgirýde baq synaıdy. Onyń basty qarsylastary – jas ıamaıkalyq Tıa jáne Tına Kleıton.
Bul qos sportshy jasóspirimder arasyndaǵy álem chempıonatynda birneshe ret jeńiske jetken. Onyń ishinde Tıa erekshe kózge túsip, 2024 jylǵy Olımpıadaǵa ıAmaıka quramasynyń sapynda qatysqan. Ol 100 metrge júgirýde jáne 4x100 metrlik estafetada (tıisinshe 7 jáne 5 oryn) fınalǵa jetken.
Sonymen qatar, jarysqa Barbados ókili Sada Ýılıams ta qatysady. Ol 400 metrge júgirýde álem chempıonatynda eki ret úshinshi oryn alǵan.
60 metrge kedergiler arqyly júgirýde jarysqa qatysýshylardyń kóshin amerıkalyq Nıa Alı bastaıdy. Bul sportshy 2016 jyly Rıo Olımpıadasynda ekinshi oryn alyp, úsh jyldan keıin álem chempıony atanǵan. Sondaı-aq, ol jabyq keshendegi álem chempıonatynda eki altyn medal ıelengen.
Uzaq qashyqtyqqa júgirýde Hırýt Meshesha (Efıopııa) jarysqa túsedi. Ol álem chempıonatynyń qola júldegeri retinde 3000 metrlik qashyqtyqty baǵyndyrýǵa tyrysady.
Bul – týrnırge qatysatyn sheteldik sportshylardyń tolyq tizimi emes. Biz tek eń tanymal atletterdi atap óttik. Qatysýshylardyń tolyq tizimi, sonyń ishinde Qazaqstan atynan qatysatyn sportshylardyń esimi keıinirek jarııalanady. 17 qańtarda Qazaqstan kýbogy bastaldy. Ulttyq quramanyń bapkerler shtaby sportshylardyń qazirgi jaǵdaıyn eskerip, sheshim qabyldaıdy dep josparlanǵan.
Aıta ketsek, byltyr osy jarysta Davıd Efremov 60 metrge kedergiler arqyly júgirýde Qazaqstan rekordyn ornatqan.
Astana Indoor Meet for Amin Tuyakov Prizes týrnıriniń jarys baǵdarlamasynda medaldar kelesi dıstsıplınalar boıynsha sarapqa salynady:
Erler: 60 metr; 60 metr kedergiler arqyly júgirý; 400 metr; 1500 metr; Bıiktikke sekirý; Uzyndyqqa sekirý.
Áıelder: 60 metr; 60 metr kedergiler arqyly júgirý; 400 metr; 3000 metr; Bıiktikke sekirý; Úsh qarǵyp sekirý; ıAdro ıterý.
Jarystar Qazaqstan jeńil atletıka kesheninde ótedi. Bıletterdi osy silteme arqyly satyp alýǵa bolady.
World Athletics Indoor Tour Gold – qysqy jeńil atletıka maýsymy týraly qalyptasqan qaýesetterdi seıiltetin jarys. Bul jerde jyldamdyq, kúsh, tehnıka jáne úzdik sportshylardyń óneri kórinis tabady. Osyndaı sıpatqa ıe sharany ótkizip alýǵa bolmaıdy.
Aıta keteıik, buǵan deıin 25 qańtarda Astanada jeńil atletıkadan Astana Indoor Meet for Amin Tuyakov Prizes halyqaralyq týrnıri ótetini týraly habarlaǵan edik.