Astanada ótetin boks keshinde Olımpıada chempıondary men júldegerleri óner kórsetedi
15 jeltoqsan kúni elorda tórinde alǵash ret bokstan «Chempıondar túni IBA» - «Astana Arlans» týrnıri ótedi, dep habarlaıdy Kazinform.
QR Boks federatsııasynyń baspasóz qyzmetiniń habarlaýynsha, kesh barysynda otandyq boksshylardyń qatysýymen 8 qyzyqty jekpe-jek uıymdastyrylady. Ár aıqas 6 raýndtan turady.
Keshtiń basty jekpe-jeginde - 71 keli salmaqta Rıo Olımpıadasynyń chempıony, 2013 jylǵy álem chempıony Danııar Eleýsinov (11-0, KO 6) Ońtústik Afrıka Respýblıkasynyń ókili Djabýlanı Makhensemen (14-2, KO 7) judyryqtasady. Eleýsinov buǵan deıin 2015 jyly sharshy alańǵa shyqqan edi. Al Makhense alǵash ret syrt elde aıqasady.
Al basty jekpe-jektiń aldynda 2019 jylǵy álem chempıony jáne Tokıo Olımpıadasynyń qatysýshysy Bekzat Nurdaýletov (6-0, 2 KO) áli jeńilip kórmegen Reseı sportshysy Nıkıta Zonmen (7-0-1, KO 5) 80 keli salmaq dárejesinde kezdesedi. 67 kelide 2023 jylǵy álem chempıonatynyń kúmis júldegeri Dýlat Bekbaýov 2019 jylǵy Eýpopa oıyndarynyń kúmis júldegeri, WBA tujyrymy boıynsha birinshi orta salmaqta 10-orynda turǵan Harıton Agrbamen (12-0, KO 8) judyryq túıistiredi.
2022 jylǵy QR chempıony, ári 2023 jylǵy 22 jasqa deıingi boksshylar arasynda Azııa vıtse-chempıony Erasyl Jaqpekov 80 kelide jastar arasynda Eýropa birinshiliginiń kúmis júldegeri (19-22 jas), Nıderlandy boksshysy Gradýs Klaýspen aıqasady.
Bıylǵy álem chempıony jáne 2022 jylǵy Azııa chempıony Aslanbek Shymbergenov 71 kelide meksıkalyq Hose Mıgel Borregomen sharshy alańǵa (20-4, KO 17) shyǵady.
2021 jylǵy álem chempıonatynyń fınalısi jáne 2022 jylǵy Azııa chempıonatynyń kúmis júldegeri Serik Temirjanov 63,5 kelide Serbııa namysyn qorǵaıtyn orys boksshysy Pavl Fedorovpen (3-0, KO 1) aıqasady.
2023 jylǵy álem chempıony jáne 2021 jylǵy álem chempıonatynyń fınalısti Mahmud Sabyrhan 57 kelide kýbalyq Osvaldo Dıaspen kezdesedi.
Týrnır eń jeńil salmaqta álem chempıony Sanjar Táshkenbaı 51 kelide 2 dúrkin Azııa chempıony, Ózbekstan sportshysy Nodırjon Mırzaahmedovtyń arasyndaǵy jekpe-jegimen bastalady.
Elimizde boks keshin — Qazsport, al Reseıde — «Match TV» kanaldary tikeleı efırde kórsetedi.
