Astanada ótetin BaiQymyz festıvalinde 16 tonnaǵa jýyq qymyz usynylady

ASTANA. KAZINFORM – Astanadaǵy «Qazanat» ıppodromynda 19-20 shilde kúnderi halqymyzdyń ejelgi ári kıeli sýsyny – qymyzǵa arnalǵan buryn-sońdy bolmaǵan kólemdegi «BaiQymyz – baptalǵan qymyz jáne ulttyq taǵamdar» gastrofestıvali ótedi, dep jazdy elorda ákimdiginiń resmı saıty.

Qazaqstannyń barlyq óńirinen 50-den astam qymyz óndirýshi qatysady. Іs-shara barysynda jalpy kólemi 16 tonnaǵa jýyq qymyz usynylady dep josparlanyp otyr.

Gastrofıstıvalge qatysý tegin. Festıvalge 50-60 myń adam kelýi múmkin.

Qonaqtar eki kún boıy ártúrli óńirlik qymyzdan dám tatyp, shıpaly sýsynnyń qasıetimen tanysady. Qymyzdyń emdik qýaty men dástúrli daıyndalý ádisteri sheberlik sabaqtary men ǵylymı konferentsııalarda keńinen talqylanady.

«Eń úzdik qymyz» ataǵy úshin baıqaý festıvaldiń basty oqıǵasy bolmaq. Sapasy men dámi úılesken, dástúrli ádispen daıyndalǵan eń shıpaly qymyz ıeleri qomaqty júlde qoryna ıe bolady.

Júlde qory – 45 mıllıon teńge:

• I oryn – 20 mln teńge;

• II oryn – 15 mln teńge;

• III oryn – 10 mln teńge.

Qymyzben qatar, is-shara aıasynda jylqy kórmesi, qazaqı tuqymdardy tanystyrý, at ábzelderi jármeńkesi, ulttyq sport túrlerinen jarystar, qolóner sheberleriniń sheberlik sabaqtary, ǵylymı konferentsııa jáne aýktsıondar ótedi. Bul arqyly jylqy mádenıeti men aýyl sharýashylyǵyna tyń serpin berý kózdelip otyr.

Festıval qonaqtary Germanııa, Reseı, Qyrǵyzstan elderinen kelgen ǵalymdar, dárigerler men veterınarlardyń baıandamalaryn tyńdap, qymyz kapsýlalaý, ashytý tehnologııasy, saqtaý ádisteri sııaqty zamanaýı tásildermen tanysady.

Aıta keteıik, qaraǵandylyqtar qymyz pisken ájeıdiń úsh metrlik músinin jasady.