Astanada ótetin álem kýbogyna qatysatyn qazaqstandyq boksshylardyń aldyn ala tizimi anyqtaldy

ASTANA. KAZINFORM - Astana qalasynda 30 maýsym - 6 shilde aralyǵynda ótetin bokstan Álem kýbogyna qatysatyn Qazaqstan ulttyq quramasynyń aldyn ala tizimi belgili boldy.

Bas bapker Qaırat Sátjanov atalǵan jarysqa birinshi nómirli bylǵary qolǵap sheberlerine úmit artatynyn málim etti. Olardyń qatarynda Sanjar Táshkenbaı (50 keli), Mahmud Sabyrhan (55 keli), Serik Temirjanov (60 keli), Ertýǵan Zeınýllınov (65 keli), Abylaıhan Júsipov (70 keli), Sabyrjan Aqqalyqov (75 keli), Nurbek Oralbaı (80 keli), Bekzad Nurdáýletov (85 keli), Saǵyndyq Toǵambaı (90 keli), Aıbek Oralbaı (90 keliden joǵary) bar.

Ulttyq qurama alǵashqy oqý-jattyǵý jıynyn 1-18 mamyr aralyǵynda Túrkistan oblysynda ótkizdi. Endi daıyndyqtyń ekinshi kezeńi 26 mamyr-9 maýsym aralyǵynda Aqmola oblysy Şýchınsk qalasynda uıymdastyrylady. Sońǵy oqý-jattyǵý jıyny 17-29 maýsym aralyǵynda ótedi. Bul - halyqaralyq deńgeıde ótetin birikken jattyǵý jıyny. Oǵan AQSh, Kanada, Irlandııa, Brazılııa jáne Aýstralııa syndy elderdiń boksshylary qatysady. 

World Boxing týrnıri úsh kezeńnen turady. Sáýir aıynda Brazılııanyń Fos-dý-Igýasý qalasynda World Boxing aıasynda ótken bokstan álem kýbogynda Dáýlet Tólemisov (85 keli), Nursultan Altynbek (55 keli), Jazıra Oraqbaeva (51 keli) chempıon atandy.

Al Uljan Sársenbek (57 keli), Dıas Moljigitov (75 keli), Danııal Saparbaı (90 keliden joǵary) qola júldege qol sozdy.

Al úshinshi kezeń 21-27 shilde aralyǵynda ótedi. Ázirge onyń qaıda ótetini belgili bolǵan joq.