Astanada ótetin AI Month sharasynyń arnaıy qonaǵy Djensen Hýang bolady
ASTANA. KAZINFORM — NVIDIA kompanııasynyń negizin qalaýshy ári bas dırektory Djensen Hýang Qazaqstanǵa alǵash ret kelip, Astanada ótetin «AI Month» sharasyna arnaıy qonaq retinde qatysady.
NVIDIA kompanııasynyń negizin qalaýshy ári bas dırektory Djensen Hýang Qazaqstan Respýblıkasy Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıevtiń shaqyrýymen Qazaqstanǵa keledi. Mártebeli meımannyń sapary Astana Hub-tyń qoldaýymen ótetin jáne AI mamandary, ázirleýshiler, startaptar, zertteýshiler men tehnologııa ónerkásibi ókilderiniń basyn qosatyn jasandy ıntellekt salasyndaǵy is-sharalar legi — «AI Month» aıasynda júzege aspaq.
- Qazirgi tańda elderdiń básekege qabilettiligi tek tehnologııalardy paıdalanýmen ǵana emes, óz sheshimderin jasap, álemdik deńgeıdegi mamandardy daıarlaý qabiletimen ólshenedi. Biz Qazaqstandy Ortalyq Eýrazııadaǵy AI-talanttardyń tartylys ortalyǵyna — ozyq ıdeıalar saraptamalyq qoldaý taýyp, myqty seriktestikter qurylatyn jáne jahandyq naryqqa shyǵýǵa jol ashylatyn mekenge aınaldyrýdy kózdep otyrmyz. Djensen syndy ındýstrııa kóshbasshylarymen pikir almasý jas ázirleýshilerge ashylyp jatqan múmkindikterdiń aýqymyn uǵynýǵa jáne tehnologııalyq ambıtsııalaryn naqty ónimge aınaldyrýǵa zor serpin beredi, — dep atap ótti Qazaqstan Respýblıkasy Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev.
«AI Month» sharasy 23 qyrkúıek kúni álemdegi eń iri AI-hakatondardyń biri sanalatyn HackAlem AI baıqaýymen bastaý alady, munda qatysýshylar ózderiniń AI-sheshimderin jasap, testileý úshin NVIDIA-nyń tehnologııalyq resýrstaryn paıdalana alady.
Sonymen qatar, «AI Month» baǵdarlamasyda Jasandy ıntellektini damytý jónindegi keńestiń otyrysy josparlanǵan. Oǵan 1 qazan kúni NVIDIA vıtse-prezıdenti Rev Lebaredıan qatysady. Al 2-3 qazan aralyǵynda «AI & Digital Bridge 2026» halyqaralyq tehnologııalyq forýmy jáne jasandy ıntellekt pen tsıfrlyq tehnologııalarǵa arnalǵan ózge de birqatar is-sharalar ótedi.
Qazaqstannyń tehnologııalyq ekojúıesi men jahandyq AI-ındýstrııa arasyndaǵy qarym-qatynas tek «AI Month» baǵdarlamasymen shektelip qalmaıdy. Sonyń aıqyn bir mysaly — jasandy ıntellekt kómegimen vıdeo men sýret jasaýǵa arnalǵan, quny 5,4 mlrd dollarǵa baǵalanǵan Higgsfield platformasy. Astana Hub qatysýshysy sanalatyn bul kompanııa óz platformasynda NVIDIA-nyń esepteý ınfraqurylymy men AI baǵdarlamalyq jasaqtamasyn qoldana otyryp, kún saıyn alty mıllıonnan astam vıdeo men sýret generatsııalaıdy. Sonymen qatar, Higgsfield Qazaqstanmen jáne Astananyń tehnologııalyq qoǵamdastyǵymen tyǵyz baılanys ornatqan, ári óńirdegi tehnologııalyq ekojúıeni qoldaý maqsatynda Astana Hub-pen belsendi yntymaqtasyp keledi.
Tsıfrlandyrý jáne jasandy ıntellekt jyly aıasynda Qazaqstan ulttyq AI-ekojúıeni júıeli túrde damytyp keledi. Bul aýqymdy jumys mamandar daıarlaý men tehnologııalyq kásipkerlikti qoldaýdan bastap, AI-sheshimderdi ázirlep, óndiriske engizýge qajetti ınfraqurylym jasaýǵa deıingi baǵyttardy tolyq qamtıdy. Al «AI Month» sharasy jasandy ıntellektiniń keleshegin jáne Ortalyq Eýrazııanyń tehnologııalyq baǵyt-baǵdaryn aıqyndaýdaǵy Qazaqstannyń rólin talqylaıtyn halyqaralyq dıalogtyń basty alańdarynyń birine aınalmaq.
Aıta ketelik Qazaqstan men Koreıa joǵary bilim jáne jasandy ıntellekt baılanysyn kúsheıtetini týraly jazǵan edik.
