Astanada ótetin jármeńkege Aqmola oblysynan 83 tonna et pen shujyq ónimderi ákelinedi
ASTANA. QazAqparat - Aldaǵy demalys kúni (1 qarashada) elordada aýyl sharýashylyq jármeńkesi ótedi. Aqmola oblysynyń taýar óndirýshileri bıylǵy jármeńkeler maýsymyn aıaqtaıdy. Kásipkerlik jáne ónerkásip basqarmasy saýda jáne qyzmet salasy bóliminiń habarlaýynsha, jármeńkege óńirdiń 17 aýdanynan 300-den astam kásiporyn qatysady.
Bul týraly elorda ákimdiginiń aqparat ortalyǵynan habarlaıdy.
Qalalyq alańda 120 saýda orny ashylyp, 4 kıiz úı tigiledi. Astana qalasynyń turǵyndary men qonaqtaryna 500 tonnadan astam 53 túri ónim usynylady. Atap aıtqanda, 190 tonna kartop, 89 tonna kókónis, 83 tonna et pen shujyq ónimderi, 50 tonna un, 20 tonna sút pen sút ónimderi, 10 tonna qant, 4,5 tonna balyq, 3 tonna jarma, 213 myń dana jumyrtqa jáne 9 myń lıtr ósimdik maıy.
Aqmola oblysy da jármeńkege kelýshiler nazaryna kontserttik baǵdarlamasyn usynady. Shara barysynda túrli shyǵarmashylyq ujymdardyń 200 astam ókili óz ónerlerin ortaǵa salady.
