Astanada ótetin XI Eýrazııalyq medıa forýmǵa 60 elden delegattar qatysady
ASTANA. 22 sáýir. QazAqparat - 25-26 sáýir kúnderi Qazmedıa ortalyǵynda XI Eýrazııalyq medıa forým ótedi.
Bul týraly búgingi baspasóz máslıhatynda Qazaqstannyń Ortalyq kommýnıkatsııalar qyzmetiniń resmı ókili Altaı Ábıbýllaev málim etti.
Onyń habarlaýynsha, forým jumysy barysynda Aýǵanstannan NATO áskerin shyǵarǵannan keıingi aımaqtaǵy qaýipsizdik, Taıaý Shyǵystaǵy shıelenis, Eýrazııalyq ekonomıkalyq qaýymdastyqtyń bolashaǵy, medıa basymdyqtar jáne aqparattyq qaýipsizdik máseleleri talqylanady. Osyǵan oraı Astanaǵa kórnekti halyqaralyq saıasatkerler, ekonomıster, qalamger-jýrnalıster men qoǵamdyq-saıası qaıratkerler shaqyrylyp otyr. «Jalpy, forýmǵa álemniń 60 elinen delegattar qatysady»,-dep atap kórsetti A.Ábıbýllaev.
