Astanada ótetin tennıs jarysyna 26 elden tennısshiler qatysady
ASTANA. QazAqparat - Shildeniń 25-i men 31-i aralyǵynda Astanadaǵy Ulttyq tennıs ortalyǵynda «Prezıdent kýbogy - 2016» halyqaralyq týrnıri ótedi, dep habarlady qalalyq ákimdiktiń baspasóz ortalyǵynan.
Jarys barysynda kásipqoı erler men áıelder sheberlik baıqasady. Sonymen qatar, balalar men áýesqoı sportshylar da baǵyn synaıdy.
«Prezıdent kýbogy» týrnırine qatysatyn sportshylar sany jyl ótken saıyn artyp keledi.
- Prezıdent kýbogy óte mańyzdy jarys. Sebebi, kóptegen úzdik tennısshiler keledi. Árıne, jarys upaılar jaǵynan ǵana emes, qurama komandalary, tennıstiń damýy jaǵynan da mańyzdy. Prezıdent kýbogy Qazaqstandaǵy eń úlken jarys. Júlde qory - 125 myń AQSh dollary, 25-26 elden tennısshiler keledi, Germanııa, Frantsııa, Ulybrıtanııa. Sondyqtan, - dedi Qazaqstannyń tennıs federatsııasynyń atqarýshy dırektory Dıas Dosqaraev.
Kýbokta 12 jasqa deıingi balalarda jarysqa túsedi. Osylaısha, jas sportshylar álemniń jetekshi tennısshileriniń oıynyn tamashalap, sheberlik dáristerge qatysý múmkindigine ıe bolady.
Atalǵan sport túriniń áýesqoılary da dodadan tys qalmaıdy. Sportshylar ІІІ Astana Open - 2016 respýblıkalyq týrnırinde kúsh synasady.
- Jarysqa úlken kóńil bólemiz. Bul jarys - tennıs meıramy. Oǵan áıelder men erler de, 12 jasqa deıingi balalar da qatysady. Balalar reıtıng upaılaryn jınaıdy. Jarys áýesqoı tennısshiler arasynda da ótedi. Astanada ınfraqurylym múmkindik beretindikten doda osynda ótip jatyr. Qalada 24 kort bar, - dedi D.Dosqaraev.
Aıta keteıik, dástúr boıynsha shilde aıynyń sońynda ótkiziletin jarysta bapkerler de bas qosady. Shara barysynda olar da ózara tájirıbe almasatyn bolady.
