Astanada ótetin strıtboldan Álem chempıonatyna 30 elden 200-den astam sportshy qatysady
ASTANA. QazAqparat - 1-5 maýsym aralyǵynda Astanada kóshe basketboly nemese strıtboldan Álem chempıonaty (FIBA 3h3 U18 World Championships) ótkiziledi.
«Atalǵan sporttyq sharany ótkizý úshin FIBA tarapy Qazaqstandy tańdaǵanyna qýanyshtymyz. Bul jarysqa 30 elden 200-den astam sportshy keletin bolady. Osy chempıonat 18 jasqa deıingi jastaǵylar arasynda uıymdastyrylady»,-dep atap ótti Ortalyq kommýnıkatsııalar qyzmetindegi baspasóz máslıhatynda QR MSM Sport jáne dene shynyqtyrý isteri komıteti tóraǵasynyń orynbasary Serik Jarasbaev.
Belgili bolǵandaı, oıyndar «Astana Opera» teatry ǵımaratynyń janyndaǵy alańda ótkiziledi. Sonymen atalǵan týrnırdi 30 myńnan astam kórermen tamashalaıdy dep kútilýde. Matchtardyń tikeleı translıatsııasyn Kazsport telearnasynan jáne FIBA-nyń Youtube-gi resmı kanalynan kórýge bolady.
Ulttyq basketbol federatsııasynyń prezıdenti Abaı Alpamysovtyń sózine qaraǵanda, Qazaqstan tarapy eki komandany daıarlap otyr. Osy rette sońǵy jarty jylda qyzý daıyndyq júrip jatyr.
Eilimiz jigitteriniń quramasy Rýmynııa, Indonezııa, Italııa jáne Qatar komandalarymen «S» tobynda kúsh synasatyn bolady. Al qyzdar «V» tobynda Nıderlandy, AQSh, Italııa, Polsha komandalarymen kezdesedi.
