Astanada ótetin strıt-vorkaýttan álem chempıonatyna 75 eldiń ókilderi qatysady (FOTO)
ASTANA. QazAqparat - Qazan aıynyń sońyna taman Astanada strıt-vorkaýt pen strıtlıftıngten álem chempıonaty ótedi dep josparlanýda. Bul týraly QazAqparat tilshisine atalmysh sport túrlerinen qazaqstandyq komandanyń bas bapkeri Aıtym Jaqypov málim etti.
Bapkerdiń aıtýynsha, bastapqyda strıt-vorkaýttan chempıonatty ótkizý qyrkúıek aıynyń sońyna qaraı josparlanǵan bolatyn. Alaıda, dodaǵa qyzyǵýshylyq artyp, álemniń túkpir-túkpirinen qatysýshylardyń tapsyrysy jalǵasa túskendikten álemdik birinshilikti ótkizý merzimi bir aıǵa deıin shegerilip otyr.
«Basynda biz elordada ótetin birinshilikke qatysý úshin 35-40 shaqty eldiń ókilderin kútken edik. Degenmen, qyzyǵýshylyqtyń artqany sonshalyqty búgingi tańda qatysýǵa 75 elden tapsyrys berilip otyr. Bul rette qatysýshylardyń jalpy sany 150 adamdy quraıtyn bolady», - deıdi A.Jaqypov.
Onyń sózine qaraǵanda, uıymdastyrýshylar chempıonatty álemdik birinshiliktiń basty qaǵıdattaryna sáıkes ótkizýge nıettenip otyr. Máselen, chempıonatta kásibı tóreshilerdi akkredıtteý qarastyrylady. Sosyn dopıngtik baqylaý zerthanasy da josparlanǵan.
«Jalpy strıt-vorkaýt búginde álemge tanymal sporttyń túrine aınalyp otyr. Sondyqtan da, Astanada ótetin chempıonat vorkaýtshylar úshin asyǵa kútetin ári keremet oqıǵanyń birine aınalady dep senemiz», - deıdi bas bapker.
Strıt-vorkaýt (street workout) - aýlalardaǵy sport alańdarynda túrli jattyǵýlardyń jıyntyǵynan turatyn buqaralyq sporttyń bir túrine jatady. Sonyń ishinde beltemirde, brýsıada, shvedtik jaqtaýlarda, jazyqtyq satylary sekildi túrli konstrýktsııalarda, tipti osyndaılardy qoldanbastan jerde jasalatyn jattyǵýlar jıyntyǵyn osylaı ataıdy.
Al Qazaqstanda strıt-vorkaýt sport túri retinde resmı moıyndalǵan, qazir elimizde Street Workout federatsııasy qyzmet etip keledi.
