Astanada ótetin MMA chempıonaty Euronews telekanalynan kórsetilmek
ASTANA. QazAqparat - Alty qurlyqtyń 150 elinen kórsetiletin Euronews telekanaly Astanada 6-7 qazan kúnderi MMA-dan ótetin álem chempıonaty týraly arnaıy reportaj túsiredi, dep habarlaıdy «QazAqparat» HAAtilshisi.
«MMA sporty Qazaqstannyń barlyq óńirlerinde órkendep keledi. Bizdiń federatsııanyń ókilderi 16 oblystyń 15-de jumystaryn júrgizip jatyr. Jastar arasyndaǵy respýblıkalyq chempıonattyń ózinde 500-600 sportshyǵa deıin qatysyp jatady. Demek, bul sannan elimizde MMA-ǵa degen qyzyǵýshylyqty baıqaýǵa bolady. Sondyqtan, MMA qazir trendte. Álemdik deńgeıde atalǵan sport keń qanatyn jaıyp keledi. Qazaqstan da bul kóshten qalmaı kele jatqanyna qýanamyz», - deıdi OKQ-da ótken baspasóz máslıhatynda QR MMA, pankratıon jáne greplıng ulttyq federatsııasynyń qurmetti prezıdenti Aıdar Mahmetov.
Onyń aıtýynsha, chempıonatty Qazsport telekanaly tikeleı efırden kórsetedi. Budan bólek, Qazaqstan men MMA sportynyń ımıdji úshin taǵy bir qýantarlyq jańalyq bar.
«Chempıonattyń qorytyndysy boıynsha Euronews telekanaly jeke repaortaj túsiredi. Bul biz úshin aıtarlyqtaı jetistik dep aıtýǵa ábden bolady. Bul tek qazaqstandyq MMA úshin ǵana emes, álemdik dárejedegi áýesqoı MMA úshin qýantarlyq jańalyq. Menińshe, osy ýaqytqa deıin birde-bir márte MMA sportyn Euronews telekanalynan kórsetken emes», - deıdi ol.
