Astanada ótetin marafonǵa qatysýshylar qandaı fýtbolka kıetini belgili boldy

ASTANA. QazAqparat - QR Jeńil atletıka federatsııasy 27 tamyz kúni elordada ótetin marafonda qatysýshylar qandaı tústi fýtbolkalar kıetinin málim etti, dep habarlaıdy QazAqparat tilshisi.

Federatsııanyń resmı taratqan málimetinde jarysqa qatysýshylardyń barlyǵy jasyl tústi fýtbolka kıedi. Sondaı-aq, marafonshylarǵa arnaıy sporttyq rıýkzak syı retinde úlestiriledi.

Esterińizge sala keteıik, «Astana EXPO-2017» kórmesiniń aıasynda ótetin ShYU jáne AÓSShK halyqaralyq marafonyna 2 myńnan astam otandyq jáne sheteldik áýesqoı júgirýshilermen qatar kásipqoı jelaıaqtar da qatysady. Marafonǵa qatysýshylar 2017 metr, 10 shaqyrym jáne 42 kılometr aralyǵynda synǵa túse alady. Qatysýshylar qaı qashyqty tańdaý óz erikinde.

Marafonǵa tirkelgender rıýkzaktary men fýtbolkalary 25-26 tamyz kúnderi «MEGA Silk Way» oıyn-saýda ortalyǵynyń aýmaǵynda «EXPO» kórmesiniń avtoturaǵyndaǵy Uıymdastyrý komıtetiniń arnaıy merekelik sharasy aıasynda aldyn ala tapsyrylady.

Jalpy, 27 tamyz kúni ótetin ShYU marafonyna qatysý úshin www.scomarathon2017.com saıty arqyly tirkelý qajet. 42 shaqyrymdyq jarysqa qatysýdyń jarnasy - 5 000 teńge, al 10 shaqyrymǵa qatysýdyń jarnasy - 3 000 teńge. Sondaı-aq, 2017 metrge júgirýge eshqandaı jarna tólenbeıdi.