Astanada ótetin kúresten Azııanyń lıtsenzııalyq irikteý týrnırine 22 eldiń palýany qatysady - D.Turlyhanov
ASTANA. 29 naýryz. QazAqparat - Londonda ótetin HHH Jazǵy Olımpıada oıyndaryna grek-rım, erkin jáne áıelder kúresinen Azııanyń lıtsenzııalyq irikteý týrnırine sary qurlyqtyń 22 elinen sportshylar qatyspaq.
Bul týraly búgin Astanada ótken baspasóz máslıhatynda QR Kúres federatsııasynyń prezıdenti, FILA Bıýrosynyń múshesi Dáýlet Turlyhanov málim etti.
Onyń aıtýynsha, Astanadaǵy týrnırdiń qatysýshylary arasynda álemdik jáne qurlyqtyq birinshilikterdiń jeńimpazdary men Azııa jáne Olımpıada oıyndarynyń júldegerleri syndy álemniń azýly sportshylary bar. Qazaqstandyq palýandar 9 olımpıadalyq joldamaǵa talasatyn bolady. Elordalyq sharshy kilemge 2008 jylǵy Beıjiń Olımpıadasynyń júldegerleri Marıd Mýtalımov, Elena Shalygına shyǵady.
Aıta keteıik, osyndaı deńgeıdegi halyqaralyq jarys Qazaqstanda alǵash ret ótip otyr.
Týrnırdiń qurmetti qonaǵy retinde Astanaǵa Halyqaralyq kúres federatsııasynyń prezıdenti (FILA) Rafael Martınettı, Azııalyq kúres federatsııasynyń prezıdenti Chang-Kıý Kım, sonymen qatar FILA uıymynyń Bıýro músheleri qatysady.
Jarys 30 naýryz ben 1 sáýir aralyǵynda «Dáýlet» sport kesheninde ótedi.
