Astanada ótetin KO memleketteri prezıdentteriniń sammıtinde syrtqy jáne ózara saýda monıtorıngi júıesin qurý týraly sheshim qabyldaý josparlanyp otyr
Bul týraly Eýrazııalyq ekonomıkalyq komıssııanyń tóraǵasy Vıktor Hrıstenko Máskeýde reseılik jáne sheteldik tilshilermen kezdesýi barysynda málimdedi.
V. Hrıstenkonyń aıtýynsha, Astanada jaqyn kúnderi ótetin Joǵary Eýrazııalyq ekonomıkalyq komıssııasynyń otyrysynda birqatar máseleler qarastyrylady. Onyń ishinde úsh memlekettiń kelisilgen agroónerkásiptik saıasatynyń bolashaǵy saralanyp, «úshtiktiń» 2013-2014 jyldarǵa arnalǵan makroekonomıkalyq saıasatynyń baǵyttaryn anyqtaý josparlanyp otyr.
Sonymen qatar halyqaralyq ózara árekettesý boıynsha birqatar máseleler qarastyrylady. Onyń ishinde EEK jumys tártibindegi ózgerister jáne KO «úshtik» elderiniń negizgi saýda seriktesterimen ózara is-qımyldary bar.
Komıssııa basshysy aldaǵy jıynǵa KO elderiniń syrtqy jáne ózara saýdasy týraly málimetti jınaý jáne saraptaýǵa arnalǵan Integratsııalyq aqparattyq júıeni qurý týraly sheshim ázirlengenin atap ótti. Onyń kómegimen ulttyq organ úshin atalmysh salalardaǵy operatsııalar týraly tikeleı aqparǵa qoljetimdi bolyp, óziniń jumysyn sátti túrde retteýge jol ashylady.
«Basty másele retinde ıntegratsııany odan ári damytýǵa negizdelgen jumys barysy talqylanbaq», - dedi EEK tóraǵasy.
V. Hrıstenkonyń aıtýynsha, úsh memlekettiń basshylary 2012 jyldyń jeltoqsanynda ulttyq úkimetterge EEK-pen birlese birneshe baǵyt boıynsha ıntegratsııanyń damý boljamdaryn 2013 jyldyń mamyryna ázirleýdi tapsyrǵan. Daıyndalǵan barlyq usynystar memleket jetekshileriniń qaraýyna joldanbaq.
«Joǵary Eýrazııalyq ekonomıkalyq keńesi otyrysynyń qorytyndysynda yntymaqtastyqtyń tıisti baǵyttary boıynsha birqatar sheshimge qol qoıylýy josparlanyp otyr», - dedi V. Hrıstenko.
