Astanada ótetin Qazaqstan saıasattanýshylarynyń kongresinde sarapshylar Ult josparynyń tezısteri men ony iske asyrýdy qamtamasyz etýdegi rólin talqylaıdy

ASTANA. QazAqparat - Erteń, 30 qazan kúni Astanada «Ult jospary jáne ǵylymı-taldaý jumysynyń jańa sapasyna ótý: problemalar men bolashaǵy» taqyrybymen ótetin Qazaqstan saıasattanýshylarynyń VIII kongresi ótedi.

Sharanyń uıymdastyrýshysy - Qazaqstan Respýblıkasy Mádenıet jáne sport mınıstrliginiń qoldaýymen «Saıasattanýshylar kongresi» respýblıkalyq qoǵamdyq birlestigi.

Kongrestiń jumysyna QR Prezıdenti Ákimshiliginiń ókilderi, Parlament depýtattary, memlekettik organdar, saıası partııalar, ÚEU, otandyq ǵylymı-akademııalyq jáne saraptamalyq-taldaý qoǵamdastyqtarynyń ókilderi, sondaı-aq Qytaı, Reseı jáne Bolgarııadan kelgen sarapshylar qatysady.

Sharanyń barysynda «100 naqty qadam: barlyǵy úshin zamanaýı memleket» Ult jospary men ony iske asyrýdy ǵylymı-taldamalyq qamtamasyz etýdiń rólin, sondaı-aq saıası ǵylymdy damytýdyń mańyzdy máselelerin ǵylymı-saraptamalyq talqylaý ótedi.

QazAqparat anyqtamasy: Saıasattanýshylar kongresi - Qazaqstannyń saıası qoǵamdastyǵyn nyǵaıtý maqsatymen 2014 jyldyń qańtar aıynda qurylǵan respýblıkalyq qoǵamdyq birlestik.