Astanada ótetin Halyqaralyq óner forýmyna Memleket basshysy N. Nazarbaev bas qonaq retinde qatysady
ASTANA. 26 aqpan. QazAqparat - Naýryzdyń 5-i men 16-sy aralyǵynda Astanada Halyqaralyq óner forýmy óz jumysyn bastaıdy. Bas qonaǵy Elbasy N. Nazarbaev bolatyn shara negizinen Astanadaǵy Qazaq ulttyq óner ýnıversıtetiniń qurylǵanyna 15 jyl tolýyna arnalady. Búgin atalǵan mádenı sharaǵa baılanysty Qazaq ulttyq óner ýnıversıtetiniń rektory, professor, Qazaqstan Respýblıkasynyń halyq ártisi Aıman Musaqojaeva aldaǵy mereıtoıdyń mádenı-baǵdarlamasymen baspasóz máslıhatynda bólisti.
Aıman Musaqojaevanyń aıtýynsha, elimizde ǵana emes, eýrazııalyq bilim keńistiginde biregeıligimen tanylyp otyrǵan Qazaq ulttyq óner ýnıversıtetiniń qurylǵanyna dál naýryz aıynda 15 jyl tolady. Búgingi kúni óner ýnıversıtetiniń 6 fakýltetinde Qazaqstannyń bútkil mádenıeti toǵysyp, óner ordasynda klassıkalyq mýzykamen qatar, halyq shyǵarmashylyǵy, rejısserlik óner men horeografııa, kıno men dızaın mamandyqtary boıynsha stýdentter bilim alýda. Ýnıversıtet oqytýshylary búgingi tańda eń suranysqa ıe bolyp sanalatyn «art-menedjer» men «kıno jáne telearna operatory» sekildi mamandyqtardy qosa alǵanda shákirtterdi 20-dan astam baǵytta bilimmen sýsyndatady.
Osyndaı óner ordasynyń shańyraq kótergenine 15 jyl tolýyna oraı Astanada 5-16 naýryz aralyǵynda Halyqaralyq óner forýmy uıymdastyrylmaq. «Forým baǵdarlamasyna kelsek, onyń eń sharyqtaý tusy bizdiń esep berý kontsertimizben aıshyqtalady ári bul sharanyń bas qonaǵy Memleket basshysy Nursultan Ábishuly bolmaq. Bul da kezdeısoqtyqtan týyndaǵan dúnıe emes. Óıtkeni, elordada boı kótergen biregeı sáýlet nysandary sekildi Qazaq ulttyq óner ýnıversıtetin ashý ıdeıasynyń avtory da N. Nazarbaev ekenin barsha jurt biledi. Mereıtoılyq kontsert «Qazaqstan» kontsert zalynda 6 naýryzda ótedi dep josparlanǵan. Budan keıin, ondaǵy baǵdarlama Mılan men Týrınniń, Vashıngton men Parıjdyń, Tokıo men Los-Andjelestiń aldyńǵy qatarly kontsert zaldaryna shyǵatyn bolady», - deıdi A. Musaqojaeva.
Budan bólek, forýmnyń qurmetti qonaqtary arasynda Monako hanshaıymy Karolın Mıýrat, Graf Petr Sheremetev, Polad Bıýlbıýl Ogly, Mıhaıl Shvydkoı, Anna Safonova sekildi tanymal tulǵalar da shaqyrylǵan.
