Astanada ótetin fýtboldan Qazaqstan sýperkýbogynyń jankúıerleri úshin arnaıy avtobýstar jolǵa shyǵarylady
ASTANA. QazAqparat - Qazaqstan fýtbol federatsııasy men Astana qalasy ákimdiginiń Jolaýshylar kóligi jáne avtomobıl joldary basqarmasy qala turǵyndary men qonaqtaryna Qazaqstan sýperkýbogy úshin arnaıy avtobýstardyń qozǵalys kestesin ázirledi, dep habarlaıdy elorda ákimdiginiń baspasóz qyzmetinen.
Jankúıerlerdiń «Astana Arena» sport keshenine barýyn yńǵaıly etý úshin qosymsha ekspress-shattl iske qosyldy. Avtobýstar elordalyq tsırk avtoturaǵynda 1 naýryz kúni saǵat 13:00-14:30 aralyǵynda turady. Sondaı-aq Astana qalasynyń ákimdigi 1 naýryzda 13:00-14:30 aralyǵynda «Qazaqstan» sport kesheninen jáne «Jastar» saraıynan «Astana Arena» stadıonyna deıin eki avtobýs baǵdaryn uıymdastyrady. Eske sala keteıik, 1 naýryzda saǵat 15:30-de «Astana Arena» sport kesheniniń alańynda el chempıony «Astana» men Qazaqstan kýbogynyń ıegeri almatylyq «Qaırat» komandalary Qazaqstan sýperkýbogyn sarapqa salady. «Sýperkýbok» ótpeli júlde bolyp tabylady, qazirgi kezde ony qaraǵandylyq «Shahter» komandasynan 1:0 esebimen basym túsken «Aqtóbe» FK ıelenip otyr. Kýbok alǵash ret 1995 jyly ótken bolatyn, oǵan 1994 jylǵy chempıonat pen Kýbok jeńimpazdary - semeılik «Elim-aı» jáne Óskemen qalasynyń «Vostok» komandalary qatysqan. Sol kezde «Elim-aı» qarsylasynyń qaqpasyna eki jaýapsyz gol soqqan edi. Sodan keıin uzaq ýaqyt boıy Sýperkýbok oınatylmady. Qol jetkizgen kýboktar sany boıynsha «Aqtóbe» FK rekord ornatty. Komanda Qazaqstannyń úsh sýperkýbogyn enshilegen (2008, 2009, 2010).
