Astanada ótetin Eýrazııa parlament basshylarynyń otyrysyna Japonııa shaqyryldy

TOKIO. QazAqparat - Búgin Qazaqstan Respýblıkasynyń Japonııadaǵy Elshisi Erlan Baýdarbek-Qojataev resmı túrde Japonııa parlamenti ókilder palatasynyń spıkeri Tadamorı Osımany Eýrazııa elderi parlamentteri spıkerleriniń 4-shi otyrysyna qatysýǵa shaqyrdy, dep habarlaıdy «QazAqparat» HAA-nyń menshikti tilshisi.

T. Osıma óz alǵysyn bildire kele, japon tarapy Astanadaǵy parlamenttik forýmǵa qatysý múmkindikterin muqııat qarastyratynyn jetkizdi. Japon saıasatkeri QR Prezıdenti Nursultan Nazarbaevtyń 2016 jyldyń qarashasynda Tokıoǵa jasaǵan resmı sapary aıasynda Japonııa parlamentinde sóılegen sózin jyly eske aldy (N. Nazarbaev - postkeńestik elder arasynda Japonııa parlamentiniń eki palatasynyń depýtattarynyń aldynda sóz sóılegen birden-bir kóshbasshy).

Óz kezeginde Elshi Erlan Baýdarbek-Qojataev Prezıdent N.Nazarbaev pen Premer-mınıstr Sındzo Abe Qazaqstan men Japonııa arasyndaǵy «keńeıtilgen strategııalyq áriptestikti» ornatý týraly deklaratsııaǵa qol qoıǵan sol sapardyń tarıhı mańyzdylyǵyn atap kórsetti.

Elshi japon saıasatkerin Qazaqstandaǵy saıası jáne ekonomıkalyq ahýalmen tanystyryp, «Nur Otan» partııasynyń bıyl 27 aqpanda ótken XVIII seziniń qorytyndylary týraly aıtty.

Eske sala keteıik, Eýrazııa elderi parlamentteri spıkerleriniń «Úlken Eýrazııa: Dıalog. Senim. Áriptestik» taqyrybyndaǵy 4-shi otyrysy Astanada 2019 jyldyń 23-24 qyrkúıek kúnderi ótedi. Buǵan 80-nen astam eldiń parlamentiniń ókilderi, sondaı-aq 16 halyqaralyq parlamenttik uıymnyń delegattary qatysady dep kútilýde.

Avtory: Sadyq Akıjanov