Astanada ótetin EQYU Sammıtine 40-tan astam memleket jáne úkimet basshylary keletinderin rastady
ASTANA. Qazannyń 15-y. QazAqparat /Rýslan Ǵabbasov/ - Búginde Astanada ótetin EQYU Sammıtine 40-tan astam memleket jáne úkimet basshylary keletinderin rastady. Bul týraly búgin Astanadaǵy lańkestikke qarsy sátti strategııa, tıimdi saıasat, aldyńǵy tájirıbe jónindegi sarapshylar konferentsııasynan keıingi baspasóz máslıhatynda Syrtqy ister mınıstrliginiń EQYU departamentiniń dırektory Serjan Ábdikárimov málimdedi.
«Sammıtke qatysýy týraly ózderiniń sheshimin rastaǵandarǵa toqtalatyn bolsaq, qazirgi kezde bul eleýli jıynǵa qatysatyndar tarapynan habar kelip túsip jatyr. Búginde 40-tan astam memleket jáne úkimet basshylary ózderiniń qatysatyndaryn rastady»,-dedi departament basshysy.
Onyń sózine qaraǵanda, sammıtke qatysatyn memleket jáne úkimet basshylary negizinen Eýropa elderinen, sondaı-aq yntymaqtastyq boıynsha áriptes Azııa memleketterinen keletin memleket basshylary.
Aıta keteıik, aldaǵy EQYU sammıti bıylǵy jeltoqsannyń 1-i men 2-si aralyǵynda Astanada ótedi. Budan burynǵy sammıtter 1975 jyly Helsınkıde, 1990 jyly Parıjde, sonymen qatar 1992 jyly Helsınkıde ekinshi ret ótken. Al 1994 jyly atalǵan alqaly jıyn Býdapeshte, 1996 jyly Lıssabonda, 1999 jyly Ystambulda uıymdastyrylǵan.
