Astanada ótetin Azııa chempıonatynda Qazaqstan atynan shyǵatyn tájirıbeli balýandar kimder

ASTANA. QazAqparat – Qazaqstan kúres federatsııasynyń Bas hatshysy Dımash Sultanov ortalyq kommýnıkatsııalar qyzmetinde ótken brıfıngide Astanada ótetin Azııa chempıonatynda Qazaqstan atynan shyǵatyn tájirıbeli balýandardy atady, dep habarlaıdy QazAqparat tilshisi.

«Qazaqstan bul chempıonatqa kúrestiń úsh túrinen de tolyq quramdy komanda qosqaly otyr. Olardyń arasynda halyqaralyq arenada birneshe ret ózin tanytqan ataqty sportshylarymyz da bar. Grek-rım kúresinen Nursultan Tursynov, Demeý Jadyraev, Almat Kebispaevtar, erkin kúresten Álem chempıonatanyń qazirgi qola júldegeri Azamat Dáýletbekov, áıelder arasynda Jámılá Baqbergenova, Elmıra Syzdyqova bar. Bulardyń bári – óte tájirıbeli sportshylar. Sondaı-aq, grek-rım kúresinen Álimhan Syzdyqov Azııa chempıony ataǵyn qorǵaıdy. Byltyr Monǵolııada ótken Azııa chempıonatynda jeńiske jetken bolatyn. Jalpy, búgingi tańda komandalar kele bastady. Halyqaralyq kúres federatsııalarynyń ókilderi de kelip jatyr. Barshańyzdy 9 sáýir kúni saǵat 17.00-de ótetin ashylý saltanatyna shaqyramyz», - dedi Dımash Sultanov.

Sport jáne dene shynyqtyrý isteri komıteti tóraǵasynyń orynbasary Aıgúl Bektenova áıelder komandasynyń sapynda Elena Shalgınanyń da birinshikte baq syınaıtynyn aıtty. Onyń málimeti boıynsha jarysta Qazaqstan atynan shyǵatyn 30 sportshynyń orta jasy mynandaı: grek-rım kúresinen – 29 jas, áıelder kúresinen – 25 jas jáne erkin kúresten – 24 jas.

Buǵan deıin habarlaǵanymyzdaı, 9-14 sáýir aralyǵynda Astanada grek-rım, erkin jáne áıelder kúresinen ótetin 36-shy Azııa chemıponatyna qurlyqtyń 24 elinen 300-den astam balýan qatyspaq.

Azııa chempıonatynda jeńgen balýandardyń jattyqtyrýshylaryna da aqshalaı syıaqy beriledi.