Astanada ótetin Azııa chempıonatyna 380-ge tarta taekvandoshy qatysady
ASTANA. Mamyrdyń 19-y. QazAqparat /Jasulan Amanbaıuly/ - Mamyrdyń 21-de Astanadaǵy «Dáýlet» sport kesheninde taekvandodan (WTF) 19-shy Azııa chempıonaty bastalady,
dep habarlaıdy QazAqparat.
Búgin uıymdastyrý jumystaryna arnalǵan baspasóz máslıhatynda Qazaqstannyń Taekvando federatsııasynyń prezıdenti Shamsat Isabekov, Azııa chempıonaty Qazaqstanda alǵash ret ótetindigin málim etti. «Azııanyń taekvando odaǵynyń bul sheshimine Qazaqstannyń bedeli jáne sportshylarymyzdyń sheberlik deńgeıi jaǵynan Azııa elderi arasynda 5-shi orynda, al Álem reıtingisi boıynsha 17-shi orynda turýy óz áserin berdi», deıdi ol.
Bıylǵy chempıonat aıasynda - Pýmse (taekvando tehnıkasyn kórsetý) birinshiligi qatar júrgiziledi. Pýmseden bolatyn jarys bıyl tarıhta alǵash ret ótpek. Bul - Qazaqstandaǵy Azııa chempıonatynyń basty jańalyǵy.
Azııa birinshiligine 20 elden 380-ge tarta sportshy kelip qatyspaq. Sonyń ishinde bul sportta des bermeıtin Ońtústik Koreıa, Japonııa, Iran taekvandoshylarynyń túgel kelýi - jarystyń asa joǵary deńgeıde ótetindigine úmit arttyrady.
Qazaqstan quramasynyń bas jattyqtyrýshysy Qaırat Qyrǵyzbaevtiń aıtýynsha, otandyq taekvandoshylardyń daıyndyǵy jaqsy deńgeıde. Jarystyń alǵashqy kezeńderinde qarsylastardy anyqtaý kezinde jerebeniń sátti túskendigin de atap ótken jón.
Halyqaralyq jarys mamyrdyń 23-i kúni aıaqtalmaq.
