Astanada ótetin aspazshylar semınaryna 350-ge jýyq kondıter qatysady
ASTANA. QazAqparat - Belgili máskeýlik aspazshy Renat Aǵzamov elordaǵa at basyn tiredi. Erteń, 3 shildede Táýelsizdik saraıynda meıman Qazaqstan men Taıaý shetelden kelgen kondıterlerge arnalǵan semınar ótkizedi. Sharaǵa 350 adam qatysady, dep jazady elorda ákimdiginiń resmı saıty.
Renat sharaǵa qatysýshylar úshin qyzyqty baǵdarlama ázirlengenin atap ótti. «Semınarda kondıterlik ónerdiń qyr-syrymen bólisemin, tort pisirgende ǵajaıyp nátıjelerge qol jetkizýge múmkindik beretin kúrdeli tehnologııalar týraly aıtamyn», - deıdi meıman.
Renat Aǵzamov bala kezinen tort pisiredi. Ol apta saıyn óz assortımentine ondaǵan jańa jáne jetildirilgen retseptter qosyp alady. Dámi men kórki ártúrli torttarǵa barsha álemnen tapsyrystar túsip jatady.
Sonymen qatar, Elorda kúni aıasynda shildeniń 4-i men 6-sy aralyǵynda «Aspazshylar sheberligi - súıikti qalaǵa» festıvali ótedi. Mereke kúnderi qalalyq alańda jetekshi aspazshylar jarysy ótedi.
Jarysqa elordalyq meıramhanalardyń úzdik aspazshylary qatysady. Festıval qonaqtary ulttyq taǵamdardyń túr-túrimen tanysady. Shara barysynda aspazshylar ózderiniń erekshe týyndylaryn kórsetse, qoǵamdyq tamaqtaný kásiporyndary servıs deńgeıi men sapasyn arttyrý múmkindigine ıe bolady.
Ádettegideı, shara barysynda elordalyq úzdik barmenniń jáne daıashynyń esimi, sondaı-aq, eń dámdi fırmalyq taǵam anyqtalady.
