Astanada ótelmeı jatqan eńbekaqy kólemi 620 mln. teńge bolyp otyr
Búgin elordada ótken «Jumys berýshi jáne jumysshy - álemettik jáne eńbek qatynastarynyń qatysýshylary» atty semınarda Eńbek jáne halyqty áleýmettik qorǵaý mınıstrligi Áleýmettik qorǵaý departamentiniń bastyǵy Erkin Rahymbergenov osyndaı málimetter keltirdi, dep habarlaıdy QazAqparat.
Onyń atap kórsetkenindeı, sońǵy on aı ishinde Astanada eńbekaqynyń keshiktirilýine qatysty 2 756 aryz kelip túsken. Osy jaǵdaıǵa baılanysty 770 kásiporyn ákimshilik jaýapkershilikke tartylyp, olardan 35 mln. teńgege tarta aıyppul óndirip alyndy.
«Bizdiń departamenttiń aryz-shaǵymdardyń negizinde jasaǵan jedel statıstıkasy boıynsha, qaladaǵy kásiporyndar men kishi kásipkerlik sýbektilerin qosa alǵanda ótelmeı jatqan jalaqy kólemi 620 mln. teńgeni quraýda. Astana boıynsha jumysshylar aldynda eń úlken qaryzy bar kásiporyn «Qýat gradstroı Astana» kompanııasy. Qazirdiń ózinde bul kompanııa jumysshylarǵa 120 mln. teńge kólemindegi eńbekaqyny óteýi tıis. Jyl basynda «Qýat gradstroı Astananyń» 280 mln. teńge qaryzy boldy», deıdi E. Rahymbergenov.
Astana qalasynyń kásipodaqtary keńesiniń tóraǵasy Sársenbaı Myńbaevtiń aıtýynsha, kásipodaq uıymdary bar kompanııalarda eńbek quqyqtary men jalaqyny keshiktirý oqıǵalary az kezdesedi. «Qazirgi ýaqytta 300-ge tarta úkimettik emes uıymdar bar. Olardyń tek 27-si eńbekkerlerdiń, azamattardyń quqyqtaryn qorǵaýǵa baǵyttalǵan. Úkimet tarapynan úlken is-qımyldar men qarajat jumsalýda. Biz barlyq kásiporyndarǵa óz ishinde kásipodaq uıymyn qurýǵa úndeımiz. Sebebi eń bastysy, jumysshylardyń quqyqtary qorǵalady, áleýmettik qobaljýlar oryn almaıdy», dep atap kórsetti ol.
Resmı derekterge súıensek, Astana qalasyndaǵy qarasha aıyndaǵy jaǵdaı boıynsha ótelmegen eńbekaqy quny 460 mln. teńgeni qurap otyr. Al bir aı buryn 760 mln. teńge bolǵan. Ótelmegen eńbekaqy kórsetkishteri bir aıda kúrt tómendegen.
Semınarda sonymen qatar, halyqty jumyspen qamtý, áleýmetti kómek, jumys berýshi men qyzmetkerler arasyndaǵy eńbek qatynastaryn retteý máseleleri sóz boldy. Onyń jumysyna jergilikti atqarýshy organ ókilderi, jumys berýshiler odaqtarynyń basshylary, zańgerler, kadrlyq qyzmet mamandary qatysty.
