Astanada otbasylyq qundylyqtardy saqtaýǵa arnalǵan trenıgterge 200-den astam otbasy qatysty
ASTANA. QazAqparat - Astanada otbasylyq qundylyqtardy saqtaýǵa arnalǵan psıhologııalyq trenıngter aılyǵy óz máresine jetti. Semınarǵa astanalyq 200-den astam otbasy qatysqan. Bul týraly Astana qalasynyń jastar saıasatyn qoldaý memlekettik qorynyń dırektory Baqytjan Júnisbekov málimdedi.
«Otbasy - memlekettiń irgetasy. Qoǵamdaǵy ár otbasynyń bosaǵasy berik, mereıi ústem bolmaı memlekettiń myqty bolýy múmkin emes. Otbasy - adam balasynyń ósip - óner, qaz turar, qanat jaıar altyn besigi. Elimizde bekitilgen «Otbasy kúni» aıasynda memleketimizde otbasyna asa zor kóńil bólinip, elimizde mereıi keń, úlgili otbasylardyń kóp bolýyna sebep bolýda. Semınar-trenıngter aılyǵy Astana qalasynyń Jastar saıasaty máseleleri basqarmasynyń qoldaýymen ótti», - deıdi B.Júnisbekov.
Qor dırektorynyń aıtýynsha, Astana qalasynyń Jastar saıasaty máseleleri basqarmasy qazan-qarasha aılarynda mádenıet, ulttyq salt-dástúrler jáne adamgershilik qundylyqtar negizinde otbasy qundylyqtaryn nyǵaıtýǵa baǵyttalǵan psıhologııalyq semınar-trenıngter aılyǵyn uıymdastyrǵan.
«Semınar-trenıngtterdiń maqsaty - jas otbasylaryna otbasy qundylyqtaryn nasıhattaý, qoǵamnyń qazirgi jaǵdaıyndaǵy jas otbasylarynda bolatyn qaqtyǵystardyń aldyn alyp, qıyn kezeńderindegi máselelerdi ońtaıly sheshýge psıhologııalyq kómek berý, otbasy arasyndaǵy tulǵa aralyq qarym-qatynasty saqtap qalý, sondaı-aq mektep oqýshylary ata-analaryna bala tárbıesine psıhologııalyq-pedagogıkalyq turǵyda keńes berý bolyp tabylady», - dedi B.Júnisbekov.
Aıta óteıik, mádenıet, ulttyq salt-dástúrler jáne adamgershilik qundylyqtar negizinde otbasy qundylyqtaryn nyǵaıtýǵa baǵyttalǵan «Mereıli otbasy» psıhologııalyq trenıngteri qazan aıynyń 6-sy men qaraı qarasha aıynyń 18-i kúnderi arasynda 10 aýla klýby qyzmetkerleriniń qatysýymen 2 ret, qaladaǵy 10 orta mektepte ata-analardyń qatysýymen 10 ret ótkizildi. Ár semınarda 20 otbasyn qamtıtyn trenıngterdi pedagogıka jáne psıhologııa salasyndaǵy tájirıbesi mol bilikti lektorlar júrgizgen.
