Astanada otbasylyq dýatlon ótedi
ASTANA. QazAqparat - 8 qyrkúıekte Astanada «Deni saý otbasy - deni saý ult» otbasylyq dýatlony ótedi, dep habarlaıdy elordanyń Mádenıet jáne sport basqarmasy.
Ata-analar men balalardan turatyn komandalar básekege túsetin sporttyq jarysty Astana qalasynyń Mádenıet jáne sport basqarmasy uıymdastyrady jáne bul shara Qazaqstanda «Otbasy kúnin» merekeleýge oraılastyrylǵan.
Eki sport túrinen jarystar - úsh qashyqtyqqa júgirý jáne velojarys Trıatlon parkte ótedi. Otbasylyq dýatlon estafeta túrinde bolady. Qashyqtyqtyń jalpy uzyndyǵy - 4,5 km.
- Júgirý (áke) - 2,1 km;
- Velojarys (ana) - 2,1 km;
- Júgirý (bala) - 300 m.
Jarys jolyna aldymen ákeler shyǵady. Olar 2,1 km júgiredi. Tranzıttik aımaqta erler estafetany 2,1 km velosıpedpen júrip ótetin analarǵa tapsyrady. Jarysty balalar 300 m júgirýmen aıaqtaıdy. Otbasylyq dýatlonǵa 8-9, 10-11 jáne 12-13 jas sanatyndaǵy balalar qatysady. Ata-analardyń jasy eskerilmeıdi. Ár top boıynsha jeńimpazdar qashyqtyqty baǵyndyrýǵa jumsalǵan eń az ýaqyt boıynsha anyqtalady. Chempıondarǵa dıplomdar men I, II jáne III oryndar úshin baǵaly syılyqtar tabystalady. Barlyq qatysýshylarǵa medaldar beriledi, sondaı-aq, tirkeý nomerleri boıynsha velosıped utysy ótkiziledi.
Jarysqa qatysý úshin óz velosıpedińiz ben shlem bolýy kerek. Shlem bolmasa, komanda jarysqa jiberilmeıdi! Sonymen qatar, tirkelý úshin jeke kýáligińiz ben balanyń týý týraly kýáligi bolýy kerek.
Qatysýshylardy tirkeý saǵat 09:00-10:30 aralǵynda júrgiziledi. Jarys saǵat 11:00-de bastalady.
