Astanada Otbasy kúnine oraı kitaphanalarda kórmeler men ekskýrsııalar uıymdastyrylady
ASTANA. 6 qyrkúıek. QazAqparat - Búginnen bastap elordada Otbasy kúnin atap ótý aıasynda kitaphanalarda ekskýrsııalar, kórmeler men «Ashyq esik» kúnderi ótedi. Bul týraly astana.kz saıtyna qalalyq Mádenıet basqarmasynan habarlady. Barlyq is-sharalar 10 qyrkúıekke deıin jalǵasady.
«Otbasy - basty áleýmettik ınstıtýt, biraq kez-kelgen bala qoǵamda ómir súrýdi úırenýi tıis. Osy maqsatta kitaphanalarda balany syrtqy álemmen qarym-qatynas ornatýǵa daıyndaýǵa arnalǵan kitap kórmeleri uıymdastyrylady. Atap aıtqanda, tanymdyq, entsıklopedııalyq ádebıet, ómir súrý qaýipsizdigin qorǵaý, etıket kitaptary, qosymsha ádebıetter»,- dep habarlady basqarmadan.
Sonymen qatar, kórmege merzimdik basylymdar men jýrnaldar da qoıylady. «Mýrzılka», «Baldyrǵan», «Balaqaı» - balalar da, eresekter de qyzyǵa oqıtyn basylymdar.
Astana qalasy Ortalyq balalar jáne jasóspirimder kitaphanasynyń qyzmetkerleriniń aıtýynsha, balalar kitaphanaǵa jıi keledi. Olardyń kitap oqýǵa degen qyzyǵýshylyǵy baıqalady. Balalar arasynda «Uldarǵa arnalǵan entsıklopedııa», «Qyzdarǵa arnalǵan entsıklopedııa», «Óziń iste», «Sheber qoldar» arnaıy kitap shaǵyrylymdary keńinen qoldanylady. Turaqty oqyrmandar qatarynda kitaphana abonementin birinshi synypta ashqandar da bar.
