Astanada Otbasy kúnin merekeleýge oraı birqatar is-sharalar uıymdastyrylady
ASTANA. 3 qyrkúıek. QazAqparat - Bıyl Otbasy kúnin atap ótý aıasynda 8 qyrkúıekte elordada 14-ten astam is-shara uıymdastyrylady. Bul týraly astana.kz saıtyna qalalyq Іshki saıasat basqarmasynan habarlady.
6 qyrkúıekte Otbasy kúnin atap ótý qarsańynda Kongress-hollda «Qos júrektiń lúpili» atty kontsert ótedi. Sahnalyq jáne otbasylyq ómirde birge júretin juptar merekelik baǵdarlamanyń basty ereksheligi bolyp tabylady.
7 qyrkúıekte Astana turǵyndary úshin qaladaǵy tirshiliktiń ózekti máseleleri boıynsha Ashyq esik kúni ótedi (Kongress-hollda).
«Bul kúni elorda turǵyndary men qonaqtary qalalyq memlekettik mekemelerdiń qyzmetterimen, josparlarymen tanysyp, ózderiniń suraqtaryn qoıady. Shara eskpozıtsııalyq-aqparattyq formatta ótedi, anyqtamalyq málimetter ǵımarat ishinde stendterde ornalastyrylady», - delingen aqparatta.
Osy kúni «Dáýlet» sport kesheninde memlekettik qyzmetkerlerdiń otbasylarynyń arasynda «Ónegeli otbasy baıqaýy» uranymen sporttyq estafeta ótedi. Іs-shara otbasylyq qundylyqtardy nasıhattaýǵa, otbasynyń oń ımıdjin jáne salaýatty ómir saltyn qalyptastyrýǵa baǵyttalǵan. Sonymen qatar, mádenı kontserttik baǵdarlama uıymdastyrylady.
Budan basqa, 2-8 qyrkúıekte jetim, ata-analarynyń qamqorlyǵynsyz qalǵan balalar, múmkindigi shekteýli jandar úshin túrli qaıyrymdylyq aktsııalar ótedi.
Qalalyq emhanalar «Otbasy jáne densaýlyq» aktsııasy aıasynda jas otbasylardy tegin qabyldaıdy, iri saýda oryndarynda Otbasy kúnine oraı halyq tutynatyn taýarlarǵa jeńildikter jasalyp, «Arzan baǵa» aktsııasy uıymdastyrylady, JOO men kásiptik orta bilim berý mekemeleri stýdentter arasynda otbasylyq qundylyqtardy nasıhattaýǵa baǵyttalǵan dárister oqyp, aktsııalar ótkizedi. Sondaı-aq, Otbasy kúnine oraı elordada jartyjyldyq mereıtoıyn atap ótken otbasylardy quttyqtaý, kóp balaly otbasylardy marapattaý, áleýmettik az qamsyzdandyrylǵan jáne tolyq emes otbasylarǵa ataýly áleýmettik kómek kórsetý uıymdastyrylady.
