Astanada otbasylyq jaǵdaıyn syltaýratyp, áriptesterin aldaǵan áıel sottaldy

ASTANA. KAZINFORM – Qylmystyq áreketterdiń saldarynan jábirlenýshilerge 2 mln teńgeden astam somaǵa shyǵyn keltirilgen. 

Astana qalasy Baıqońyr aýdanynyń prokýratýrasy alaıaqtyq týraly qylmystyq isi boıynsha memlekettik aıyptaýdy qoldady.  

— Sottalǵan áıel bala kútimi boıynsha demalysta bola otyryp, bir jyl boıy óziniń áriptesterin júıeli túrde jańylystyryp, otbasynda qaıǵyly oqıǵalar boldy dep, onyń ishinde anasynyń qaıtys bolýy jáne balasynyń aýyr hálde ekendigi jóninde kórineý jalǵan málimetter habarlap, sol arqyly olardyń janashyrlyq sezimin týdyrǵan.

Onyń sózderine sengen jáne kómek kórsetkisi kelgen áriptesteri, otbasylyq máselelerdi sheshýge jáne balany emdeýge qajet dep oılap, sottalǵan áıelge aqsha qarajatyn aýdaryp otyrǵan, — delingen habarlamada.

Qylmystyq áreketterdiń saldarynan jábirlenýshilerge 2 mln teńgeden astam somaǵa shyǵyn keltirilgen.

— Jeńildetetin mán-jaılardy, atap aıtqanda kinásin moıyndaýyn, shyn júrekten ókinýin, keltirilgen zalaldy ishinara óteýin eskere otyryp, sot úkimimen oǵan 3 jyl merzimge probatsııalyq baqylaý belgilene otyryp, bas bostandyǵyn shekteý jazasy taǵaıyndaldy, — delingen prokýratýra habarlamasynda.

Úkim zańdy kúshine endi.

Qala prokýratýrasy materıaldyq kómek suraý nemese qarajat jınaý jaǵdaılarynda saq bolýǵa jáne aqparattyń durystyǵyn tekserýge keńes beredi. 

Aıta ketelik alaıaqtar halyqty sotqa qatysý týraly jalǵan habarlama arqyly aldaı bastaǵany týraly jazǵan edik.