Astanada otandyq jáne sheteldik medıatorlar úshin trenıngter ótkizilýde

ASTANA. QazAqparat - Daýlardy boldyrmaý jáne aldyn alý boıynsha medıatsııa ortalyǵynyń keńeıtilgen otyrysynyń aıasynda Astanada praktıkalyq semınar-trenıng ótkizilýde.

Oǵan medıatsııa salasynda qyzmet etetin otandyq jáne sheteldik mamandar, sonymen qatar barlyq óńirlerden Qazaqstan halqy Assambleıasynyń ókilderi kelip qatysýda.

«Atalǵan shara taza tájirıbege, naqty mysaldarǵa súıengen myqty sarapshylardyń tálimin jetkizý úshin uıymdastyrylyp otyr. Túrli qaıshylyqtardy sheshýde medıatsııa ınstıtýty, onyń tetikteri men ádisteriniń orny bólek. Halyqaralyq tájirıbege qaraǵanda, bizdiń ustanyp otyrǵan jolymyz birshama ózgesheleý dese de bolady. Eger álemdik medıatsııada týyndaǵan daýlardyń sheshý jáne túrli tetikterdi qoldaný bolsa, qazaqstandyq medıatsııa ony boldyrmaýdyń, qoǵamdyq kelisimniń odan ári bekı túsýine baǵyttalǵan sheshimderge kóp mán beredi», - deıdi QR Prezıdenti janyndaǵy «Qoǵamdyq kelisim» RMM dırektory Natalıa Kalashnıkova.

Onyń sózine qaraǵanda, trenıngte otandyq jáne sheteldik medıatsııanyń úzdik tetikteri usynylady.

«Biz trenıng qorytyndysy boıynsha Qazaqstannyń medıatsııa modelin qalyptastyrýdyń joldaryn kórgimiz keledi. Quramymyz óte sapaly, sheteldik sarapshylarmen qatar, aımaq ókilderi, otandyq medıatorlar kelip otyr. Qoǵamdyq kelisim keńesterin, analar keńesiniń múshelerin, ǵylymı-sarapshylyq qaýymdastyqty arnaıy shaqyrttyq. Olar osynda joǵaryda aıtylǵan sheshimderdi jasaqtaıtyn bolady», - dep atap ótti ol.

Semınar aıaqtalysymen qatysýshylar halyqaralyq úlgidegi arnaıy sertıfıkattar alady.