Astanada otandyq munaı-gaz kompanııalarynyń korporatıvtik kommýnıkatsııalaryn damytý taqyryby kóterildi
ASTANA. Sáýirdiń 13-i. QazAqparat /Jasulan Amanbaıuly/ - Búgin Astanada «Samuryq-Qazyna» korporatıvti ýnıversıtetiniń uıymdastyrýymen Qazaqstandaǵy munaı-gaz kompanııalarynyń korporatıvtik kommýnıkatsııalarynda veb-keńistikti qoldaný taqyrybynda dóńgelek ústel jumysy ótti,
dep habarlaıdy QazAqparat
Jıynda qazaqstandyq «QazMunaıGaz» kompanııasy jáne «Shell» kontserniniń ókilderi korporatıvti veb-saıttardy damytýdyń birlesken jobalaryn qurý, jańa tehnologııalardy qoldaný, aqparattyq jeliler salasyndaǵy sońǵy úderister men tájirıbedegi tabysty jobalardy sóz etti.
Dóńgelek ústelge shaqyrylǵan arnaıy qonaq, «Shell» kompanııasynyń veb kommýnıkatsııalar jónindegi vıtse-prezıdenti Saımon Sevıll, ınternette aqparattardy jarııalaýdyń negizgi talaptaryna, saıt mazmunyna qatysty usynystar men veb-kommýnıkatsııalar salasyndaǵy zamanaýı tehnologııalar jaıynda áńgimelep berdi. Onyń aıtýynsha, kompanııa jumysynda korporatıvtik qatynasty ınternet keńistik arqyly úılestirýdiń negizgi basymdyǵy - ashyqtyq, jarııalylyq. Kompanııanyń ashyqtyǵy, kez kelgen ýaqytta baılanys qurýǵa daıyn ekendigin kórsetý - onyń bedeline oń áserin tıgizedi. Sonymen qatar kompanııa týraly jaǵymdy oılardy qalyptastyryp, múddesine qyzmet jasaıtyn bolady.
«Ekinshi jaǵynan veb-kommýnıkatsııalyq tehnologııalar kompanııanyń korporatıvtik basqarýyn tıimdi júrgizýge arnalǵan platforma. Investorlarmen, jetkizýshilermen, tasymaldaýshylar men merdigerlermen,tutynýshylarmen jáne qoǵammen bolatyn iskerlik qarym-qatynasty jyldam ári yńǵaıly uıymdastyrýǵa múmkindik beredi», deıdi S. Sevıll.
Qazaqstandaǵy munaı-gaz kompanııalary ózderiniń korporatıvtik kommýnıkatsııalar salasynda veb-keńistikti qoldaný tájirıbesin baıaǵyda qolǵa alǵan. Máselen, Qazaqstannyń 22 buqaralyq kompanııalary arasynda sheteldik Standart & Poor's ortalyǵy aqparattyq ashyqtyq deńgeıine zertteýler júrgizgen. Ol boıynsha «QazMunaıGaz» barlaý, óndirý» AQ-y kompanııasy eń jarııaly, eń ashyq dep tanyldy. Zertteýde atalyp kórsetilgenindeı, kompanııanyń aldyńǵy qatarǵa shyǵýyna áser etken jaıttardyń biri - kompanııa saıtynda ınvestorlarǵa arnalǵan kúntizbelerdiń bekitilýi, naryq qatysýshylaryna óte mańyzdy ýaqyttar men merzimderdiń kórsetilýi jáne aktsıonerlerdiń jalpy otyrysy materıaldaryn jarııalaýy bolǵan. Al KASE qazaqstandyq qor bırjasy 2009 jyly «QazMunaıGaz» barlaý, óndirý» AQ-yna «Ashyqtyqqa degen talpynysy úshin» dıplomyn tabys etken. Kompanııa baǵaly qaǵazdar naryǵynda iskerlikti qalaı júrgizý kerektigin jaqsy kórsetken lıstıngilik ujym dep sanaldy.
«Samuryq-Qazyna» korporatıvti ýnıversıteti 2009 jyly Qazaqstannyń alty iri munaı kompanııalarynyń «Qyzmetshilerdi damytý biryńǵaı ortalyǵynyń» bazasynda qurylǵan bolatyn.
