«Astanada otandyq qurylys ónimderiniń tanystyrylymy ótti
ASTANA. QazAqparat - «Astana Bas jospary» JShS ǵımaratynda elordalyq Kásipkerler palatasy qalalyq ákimdiktiń Sáýlet jáne qala qurylysy basqarmasynyń uıymdastyrýymen otandyq qurylys ónimderiniń kórsetilimi ótti. Atalmysh sharanyń basty maqsaty - otandyq taýar óndirýshilerdiń jumysyn nasıhattaý.
Bul týraly Astana qalasy ákimdiginiń resmı saıty habarlady.
Shara aıasynda birneshe elordalyq kompanııa óz ónimderin tanystyrdy. Solardyń ishinde ınnovatsııalyq tehnologııalar arqyly «Sımpolıt júıe» ataýymen qurylys materıaldaryn shyǵaratyn «AS BEREKE» JShS bar. Bul «Sımprolıt» polıstırol betonyn qoldaný arqyly zamanaýı ǵımarat qurylysyn júzege asyratyn ınnovatsııalyq júıe.
Sonymen qatar, sharaǵa alıýmınıı terezeler men esik jaqtaýlaryn qurastyratyn "ALUGAL" kompanııasy qatysty. Atalmysh kásiporyn Qazaqstan naryǵynda 10 jylǵa jýyq ýaqyt boıy jumys istep keledi jáne óz ónimderin Reseı men Qyrǵyzstan elderine eksporttaıdy. Kompanııanyń marketıng jónindegi dırektory Narıman Maqajanovtyń aıtýynsha, mundaı sharalar kóptegen jobalaý mekemelerine ónimderin kórsetip, aýdıtorııany otandyq qurylys taýarlarymen etene tanystyrýǵa jol beredi.
