Astanada otandyq qoldanbaly óner sheberleriniń kórmesi ótedi
ASTANA. 25 sáýir. QazAqparat - Aǵymdaǵy sáýir aıynyń 29-y kúni QR Prezıdenttik mádenıet ortalyǵynda Qazaqstan halqynyń birligi merekesine oraı otandyq qoldanbaly óner sheberleriniń kórmesi ashylady.
Tórt kúnge jalǵasatyn kórmeniń uıymdastyrýshylary - QR Prezıdenttik mádenıet ortalyǵy jáne «Sheberler aýyly» sheberler qaýymdastyǵy.
San ǵasyrlyq tarıhy bar qoldanbaly óner ulttyq mádenıettiń kórsetkishi, qazirgi zamanǵy ónerdiń birqatar baǵyttary úshin qaınar kóz. Ár sheber óziniń buıymynda ótken urpaqtyń qalyptastyrǵan ádis-tásilderin qatań saqtap qana qoımaı, ony zamanaýı talaptarǵa saı jańasha jasaıdy. Osyndaı úılesimdiliktiń nátıjesinde ásem tabıǵatty, baı tarıhı murany beıneleıtin óner týyndysyn tamashalaýǵa bolady.
Kórmege kelýshilerdiń nazaryna Amangeldi Muqajanov, Serikqalı Kókenov, Kálimhan Rahmetbaıqyzy, Lılııa Kım, Mırlan Mambetaqunov jáne basqa da sheberlerdiń kıizden, tabıǵı tastardan jasalǵan, aǵashtan oıylǵan buıymdary men kádesyılary, sonymen qatar qazaqtyń zergerlik zattary, ázirbaıjandyq kilemder men ózbek kestesi usynylady.
Atalǵan is-shara elimizdegi qolóner sheberleriniń shyǵarmashylyq baılanysyn nyǵaıtyp, ár halyqtyń ulttyq murasyn, qaıtalanbas mádenıetin damytýdy maqsat etedi. Qazaqstan Respýblıkasynyń kóp ultty halqynyń sheberleri usynatyn túrli qolóner ónimderi elorda turǵyndary men sheteldik qonaqtardyń úlken qyzyǵýshylyqtaryn týǵyzatyndyǵyna shúbá joq.
Іs-sharaǵa elordanyń turǵyndary men qonaqtary, sonymen qatar QR Mádenıet mınıstrligi, Qazaqstan halqy Assambleıasy, halyqaralyq mádenı ortalyqtar, elshilikter shaqyrylyp otyr.
