Astanada otandyq óndirýshilerdiń «ULTTYQ ÓNIM — 2026» atty iri kórmesi ashyldy

QR Aýyl sharýashylyǵy mınıstrligi bapasóz qyzmetiniń habarlaýynsha, Kórme alańynda Qazaqstannyń barlyq óńirinen kelgen 600 taýar óndirýshi óz ónimin usyndy. Bul ótken jylǵy kórsetkishten eki ese derlik artyq.

Saltanatty ashylý rásimine QR Premer-mınıstriniń orynbasary — ulttyq ekonomıka mınıstri Serik Jumanǵarın, memlekettik organdar men bıznes-qoǵamdastyq ókilderi qatysty.

Kórmeniń ashylýynda Serik Jumanǵarın Qazaqstan Respýblıkasynyń Premer-mınıstri Oljas Bektenovtiń úndeýin oqydy.

-Prezıdentimiz Qasym-Jomart Kemeluly Toqaev ekonomıkanyń ósýine tyń serpin berip otyrǵan shaǵyn jáne orta bıznesti damytýǵa árdaıym erekshe kóńil bólip keledi. Memleket tarapynan kásipkerlikti qoldaý men oǵan qolaıly jaǵdaı jasaýǵa, iskerlik belsendilikti keńeıtýge jáne elimizdiń ekonomıkalyq áleýetin nyǵaıtýǵa baǵyttalǵan keshendi sharalar dáıekti túrde júzege asyrylýda, — delingen Oljas Bektenovtiń úndeýde.

Kásipkerlikti odan ári damytý perspektıvalary atap ótildi. 

-Jańa Konstıtýtsııada halyqtyń ál-aýqatyn arttyrý, jaýapty ári jasampaz patrıotızm ıdeıasyn ilgeriletý memleket qyzmetiniń negizgi qaǵıdattarynyń biri retinde aıqyndalǵan. Otandyq taýar óndirýshiler osy atalǵan qaǵıdattardy júzege asyrýdyń jarqyn úlgisi bolyp otyr. Kásipkerlik belsendiliktiń turaqty ósýin qamtamasyz etý úshin óndiristik bastamalardy, onyń ishinde ımportty almastyrý men eksporttyq áleýetti arttyrý, zamanaýı tehnologııalardy engizý jáne óńirlerdiń ósip-órkendeýine jol ashatyn jańa óndiris oryndaryn barynsha damytý isi jalǵasyn tabady, — dep atap kórsetilgen Premer-mınıstr sóziniń mátininde.

Júzege asyrylyp jatqan memlekettik qoldaý sharalarynyń ishinde bıznestiń qarjylandyrýǵa jáne jeńildetilgen nesıeleý quraldaryna qoljetimdiligin keńeıtýge erekshe nazar aýdarylady. 2025 jyly «Damý» qory arqyly bıznesti qoldaýǵa 560 mlrd teńgeden asa qarajat jumsalǵan. Osynyń arqasynda 13 myń ShOB jobasy jalpy somasy 2,2 trln teńgege memlekettik qoldaý sharasymen qamtylyp otyr. Júzege asyrylǵan sharalar nátıjesinde 15 myńǵa jýyq jańa jumys ornyn ashylyp, ónim shyǵarýdyń 27,7 trln teńgege jáne salyq túsiminiń 2 trln teńgege jýyq ósýin qamtamasyz etti.

Ekonomıkanyń naqty sektoryn damytýdyń negizgi tetiginiń biri «Investıtsııaǵa tapsyrys» baǵdarlamasy dep atalady. Onyń negizgi mindeti — ımportqa táýeldiligi joǵary salalardaǵy jobalardy qoldaý jáne ishki naryq pen eksportqa baǵdarlanǵan jańa óndirister qurý.

Baǵdarlamany júzege asyrýda «Báıterek» holdınginiń ınstıtýttary men «Damý» qoryna basty ról berilgen.

 -Kásipkerlerdi qarjylandyrý men qoldaýdyń qoljetimdiligin arttyrý úshin «Damý» qory kepildik berý quraldaryn edáýir keńeıtti. Óńdeýshi ónerkásip kásiporyndarynyń jabdyqtaryn jańǵyrtý úshin «Órleý» jáne «Órleý-lızıng» jeńildikpen nesıeleý baǵdarlamalary arqyly qoldaýdyń naryqtyq tetikterin kúsheıtti. Sondaı-aq «Іsker aımaq» baǵdarlamasy júzege asyp jatqan shaǵyn qalalar men aýyldarda mıkro jáne shaǵyn bıznesti keshendi qoldaý baǵdarlamasyn iske qosty. Qordyń óńirlik fılıaldarynyń bazasynda biz «Báıterek» holdınginiń bıznesti qoldaýdyń barlyq baǵdarlamalary boıynsha biryńǵaı front-keńseler qurdyq, al shalǵaı aýdandar úshin mobıldi front-keńse maqsatyndaǵy arnaıy shaǵyn avtobýstar iske qosylady, onda mamandar kásipkerlerge keńes berý úshin shalǵaı aýdandarǵa baratyn bolady», — dep atap ótti «Damý» qorynyń basqarma tóraǵasy Farhat Sársekeev.

Qıyndyqqa tap bolǵan kásipkerlerdi súıemeldeýge erekshe nazar aýdarylady. Osyǵan baılanysty «Damý» qory janynan «ońaltý ortalyqtary» qurylýda. Onda bıznes turaqtylyǵyn qalpyna keltirý úshin qarjylyq, konsýltatsııalyq jáne uıymdastyrýshylyq qoldaý ala alady.

Qazaqstan Respýblıkasy Úkimetiniń atynan vıtse-premer otandyq kásipkerlerge eldiń ekonomıkalyq áleýeti men bedelin nyǵaıtýǵa qosqan úlesi úshin alǵys bildirdi.

Serik Jumanǵarın kórmeni aralap kórip, elimizdiń túrli óńirinen kelgen birqatar kásiporynnyń qyzmetimen tanysty.

Pavlodarlyq «Fenıks» jıhaz fabrıkasy áleýmettik jáne kommertsııalyq nysandarǵa arnalǵan mektep jıhazyn, keńse kreslosy men oryndyq shyǵarady. Memlekettik qoldaýdyń arqasynda kásiporyn jańa jabdyqtar satyp alyp, óndiristik qýatyn keńeıtken. Qyzmetkerler qatary 15-ten 60 adamǵa deıin kóbeıgen. Búginde zaýyt jylyna 60 myńǵa deıin oryndyq, 40 myńǵa jýyq mektep jıhazy men 7 myń keńse kreslosyn shyǵarady. Kásiporyn ónimi búkil el boıynsha bilim berý mekemelerine jetkiziledi.

Sondaı-aq vıtse-premer Qazaqstanda ósimdik negizindegi ekologııalyq taza turmystyq hımııa óndirýshisi — Qaraǵandy oblysynan shyqqan «WEC TRADE» JShS ónimderimen tanysty. 2016 jyly avtohımııa shyǵarýdan bastap, búginde WEC brendi turaqty damý jáne ekologııalyq jaýapkershilik qaǵıdattaryna sáıkes keletin adam men qorshaǵan ortaǵa qaýipsiz ónimder shyǵarady.

Vıtse-premer syrtqy ınjenerlik jelilerge arnalǵan jabdyqtardyń jetekshi qazaqstandyq óndirýshisi — TAZAU tazartý qurylystary zaýytynyń qyzmetine erekshe nazar aýdardy. Kásiporyn on jyldan astam jumys istep, Qazaqstan men TMD elderiniń aýmaǵynda jobalardy júzege asyrýda. Sarqyndy sýlardy tazartý salasynda sheshimder jasaıdy.

«Ulttyq ónim — 2026» kórmesi EKSPO HKO-da 24 mamyrǵa deıin jalǵasady. Osy kúnder boıy ol B2B-kezdesýler, paneldik sessııalar, sheberlik synyptary men qazaqstandyq bıznestiń jetistikterin kórsetý úshin tıimdi alańǵa aınalady.

Osyǵan deıin Qazaqstannyń astyq eksporty 11,7 mln tonnaǵa jetkeni týraly jazdyq.