Astanada «Otandaǵy kontsert» klassıkalyq mýzyka keshi ótedi
ASTANA. 12 jeltoqsan. QazAqparat - 13 jeltoqsanda Astanalyq fılarmonııa Qazaq ulttyq óner ýnıversıtetiniń organ zalynda klassıkalyq mýzyka keshin ótkizedi, dep habarlady fılarmonııanyń baspasóz qyzmeti.
Kesh baǵdarlamasynda V.A.Motsarttyń orkestr men skrıpkaǵa arnalǵan №4 kontserti, P.I.Chaıkovskııdiń «Romeo men Djýletta» ývertıýrasy, M.Brýhtyń orkestr men skrıpkaǵa arnalǵan №1 kontserti oryndalady. Bul shyǵarmalardy QR eńbek sińirgen qaıratkeri, bas dırıjer jáne kórkemdik jetekshisi Abzal Muhıtdınov basqarǵan Astana memlekettik fılarmonııasynyń sımfonııalyq orkestri men kóptegen halyqaralyq konkýrstardyń laýreaty Ordabek Dúısen oryndaıdy.
Ordabek Dúısen qazaqstandyq skrıpka mektebiniń talantty jas ókilderiniń biri. Ol 1981 jyly Almatyda mýzykanttar otbasynda dúnıege kelgen. Kúlásh Baıseıitova atyndaǵy respýblıkalyq mamandandyrylǵan mýzyka mektebinde, Qazaq ulttyq mýzyka akademııasynda jáne AQSh-tyń Tehas shtatyndaǵy Dallas ýnıversıtetinde bilim aldy. Professorlar Svetlana Ábdisadyqovanyń, Aıman Musaqojaevanyń (Qazaqstan) jáne Edýard Shmıderdiń (AQSh) shákirti. Respýblıkalyq jáne halyqaralyq konkýrstardyń laýreaty, jas oryndaýshylardyń HH respýblıkalyq konkýrsynyń Gran-prı ıegeri, Frants Shýbert atyndaǵy halyqaralyq konkýrstyń І júldegeri. Kóptegen shetelderdiń bedeldi sahnalarynda óner kórsetip júr.
Orbadek óziniń kontsertteriniń baǵdarlamasyna klassıkalyq mýykadan basqa Qazaqstan kompozıtorlarynyń shyǵarmalary men halyq áýenderin qosyp otyrady, sóıtip, Qazaqstannyń mýzyka mádenıetin shetelderde nasıhattaýǵa eleýli úles qosyp júr.
