Astanada Otan qorǵaýshylar kúnine arnalǵan plats-kontsert ótedi
ASTANA. KAZINFORM — Astana qalasyndaǵy Qazaq eli alańynda 7 mamyr kúni saǵat 11:00–de Otan qorǵaýshylar kúnine arnalǵan plats-kontsert ótedi, dep habarlaıdy elorda ákimdiginiń resmı saıty.
Іs-shara aıasynda kórermenderge áskerı orkestrler men memlekettik organdardyń saptyq eseptoptarynyń qatysýymen merekelik baǵdarlama usynylady.
Sondaı-aq saptyq daıyndyq elementteri men saltanatty bólimshelerdiń kórsetilimdik qoıylymdary da sahnalanady.
Plats-kontsertke Qazaqstan Respýblıkasynyń Memlekettik kúzet qyzmeti, Qazaqstan Respýblıkasynyń Qorǵanys mınıstrligi, Qazaqstan Respýblıkasy Іshki ister mınıstrliginiń Ulttyq ulany, Qazaqstan Respýblıkasy Ulttyq qaýipsizdik komıtetiniń Shekara qyzmeti jáne Qazaqstan Respýblıkasynyń Tótenshe jaǵdaılar mınıstrliginiń ókilderi qatysady.
Osyǵan deıin Astanada álemdik mánerlep syrǵanaý juldyzdary óner kórsetkenin jazdyq.
