Astanada osy oqý jylynda taǵy 7 mektep ashylady
Astanada osy oqý jylynda taǵy 7 mektep ashylady. Bul týraly qala ákimi Jeńis Qasymbek Instagram paraqshasynda jazdy, dep habarlaıdy Kazinform.
«Infraqurylymdyq jáne áleýmettik nysandardy salý jumysyn jalǵastyramyz. Máselen, osy oqý jylynda taǵy 7 mektep ashamyz. Atalǵan oqý oryndarynyń qurylys barysymen tanystym. Bul mektepter Qarasaı batyr men Bulanty kósheleriniń qıylysynda, Turan dańǵyly men №24 kósheniń qıylysynda ornalasqan. Sol sııaqty qoldanystaǵy mektepterdiń aýmaǵyna jańa korpýstar salynady: Kırpıchnyı eldi mekeninde, Tarhan kóshesi, 16, Taha Hýseın kóshesi, 5/1, Qarqabat kóshesi, 17, Qabanbaı batyr dańǵyly, 9,1 mekenjaılarynda. Osyǵan deıin oqý jylynyń basynda 4 mektep ashylǵan bolatyn», - dedi Jeńis Qasymbek.
Sonymen qatar ákim Memleket basshysynyń tapsyrmasy boıynsha elordada «Jaıly mektep» ulttyq jobasyn júzege asyrylyp jatqanyn jetkizdi. Joba aıasynda 2024-2025 jyldary 24 jaıly mektep salynady. Olar 90 myńǵa jýyq oqýshy ornyn (2 aýysymdy) ashýǵa múmkindik beredi. Olardyń 15-i Esil men Nura aýdandarynda ornalasady. Dál qazir bul aýdandarda mektepterge degen asa qajettilik bar.
«2027 jylǵa deıin bas-aıaǵy 180 myńǵa jýyq oqýshy ornyna (2 aýysymda) arnalǵan 65 mektep salýdy josparlap otyrmyz. Bul sharalar mektepterge shamadan tys túsetin júktemeniń qazirgi qıyndyǵyn ǵana emes, bolashaqta oryn tapshylyǵy máselesin tolyqtaı sheshedi. Oqý oryndary qalanyń barlyq aýdanyn, onyń ishinde eldi mekenderdi de qamtıdy», – dep jazdy Jeńis Qasymbek.
