Astanada osy demalysta Abaı men Pavlodar oblystarynyń azyq-túlik jármeńkesi ótedi
Aldaǵy demalys kúnderi elordada aýyl sharýashylyǵy taýaryn óndirýshilerdiń kezekti óńirlik jármeńkesi ótedi. Bul joly Astanaǵa óz ónimderin Pavlodar men Abaı oblystarynyń sharýalary jetkizedi, dep habarlaıdy QazAqparat elorda ákimdigine silteme jasap.
Jármeńke senbi-jeksenbi kúnderi saǵat 09.00-den 18.00-ge deıin Shabyt óner ýnıversıtetiniń aldyndaǵy alańda ótedi.
Eki óńirden 40 túrli jalpy kólemi 700 tonnaǵa jýyq ónim jetkiziledi dep josparlanyp otyr. Olardyń arasynda et-sút, shujyq, balyq ónimderi, qant, un, jarma, ósimdik jáne janýar maıy, jemis-kókónis, jemis-jıdek, bal, ulttyq sýsyndar men taǵamdar jáne t.b. bar.
Pavlodar oblysynyń atynan Pavlodar, Aqsý, Ekibastuz qalalary, oblystyń 10 aýyldyq aýdan qatysady.
Olar 350 mln teńgeden astam somaǵa 560 tonna ónim, onyń ishinde et (sıyr eti, jylqy eti, qoı eti), et-sút ónimderi, kartop, kókónister, un, jarma, nan-toqash jáne kondıterlik ónimder jetkiziletin bolady.
Ótken jyldary pavlodarlyq aýyl sharýashylyǵy ónimderi elorda turǵyndary arasynda úlken suranysqa ıe bolǵan jáne jármeńke kezinde ónimder tolyqtaı satylyp ketken.
Ásirese qala turǵyndary arasynda et, et ónimderi, bal, kartop jáne kókónister suranysqa ıe.
Pavlodarlyq kásiporyndar elorda turǵyndaryna taýar óndirýshilerdiń baǵasy boıynsha azyq-túliktiń keńeıtilgen assortımentin usynady.
Olardyń aıtýynsha, ónimder ekologııalyq taza ǵana emes, sonymen qatar dámi de erekshe.
Al Abaı oblysynan Semeı qalasy, Abaı, Aıagóz, Besqaraǵaı, Borodýlıha, Kókpekti, Aqsýat, Úrjar jáne Jarma aýdandarynyń sharýalary keledi. Olar 120 tonnadan astam ónim ákeledi.
Onyń ishinde mynadaı ónimder bar:
Et (sıyr eti, jylqy eti, qoı eti) – 47 tonna;
Qus eti – 4 tonna;
Kókónister – 40 tonna;
Ósimdik maıy – 1 tonna;
Sút ónimderi – 5 tonna;
Bal – 8 tonna;
Ulttyq taǵamdar (qurt, baýyrsaq jáne t.b.) – 2 tonna;
Qymyz – 1 tonna;
Shujyq ónimderi – 1 tonna;
Balyq – 1 tonna;
Kondıterlik ónimder – 0,5 tonna;
Baý-baqsha ónimderi (qarbyz) - 10 tonna.
