Astanada osy demalys kúnderi aýyl sharýashylyǵy jármeńkeleri bastalady

ASTANA. KAZINFORM – Astanada elimizdiń óńirlerinen taýar óndirýshilerdiń qatysýymen aýyl sharýashylyǵy ónimderiniń jármeńkeleri bastalady. Olar ár senbi men jeksenbide 27 qazanǵa deıin ótedi, dep habarlaıdy elorda ákimdiginiń resmı saıty.

21 qyrkúıekte bastalatyn jármeńkede elordada óz ónimderin birinshi bolyp Aqtóbe, Atyraý jáne Jambyl oblystarynyń agrarshylary usynady. Olar et, balyq, sút, azyq-túlik ónimderin, sondaı-aq kókenister men jemisterdi tikeleı fermerlerden usynady. Bul azyq-túliktiń qoljetimdiligin arttyrýǵa da, otandyq óndirýshini qoldaýǵa da yqpal etedi.

Úsh oblystyń aýyl sharýashylyǵy taýaryn óndirýshiler Astanaǵa 125 tonna et jáne et ónimderin, 250 tonna kókenister men jemisterdi, 26 tonna sút ónimderin, 22 tonna balyq, 26 myń jumyrtqa, 2 tonna nan-toqash ónimderin jáne 60 tonna ózge de azyq-túlik ónimderin ákeledi.

Jármeńke barysynda kontserttik baǵdarlama da uıymdastyrylady.

Aıta keteıik, bıyl jármeńke «Qazanat» ıppodromyna qarama-qarsy, Qarqaraly tas jolynda ótedi. Sondaı-aq elorda turǵyndary men qonaqtaryna yńǵaıly bolýy úshin jármeńkelerdi ótkizý kezeńinde № 18, 37, 303 jáne 323 avtobýs marshrýttary qamtamasyz etiledi.

Aýylsharýashylyq jármeńkesi saǵat 9.00-den 18.00-ge deıin jumys isteıdi.