Astanada orys mektepterine qazaq tilinen sabaq beretin muǵalimderge semınar ótkizildi
ASTANA. 6 qarasha. QazAqparat - Búgin Astanadaǵy Nazarbaev ortalyǵynda «Memlekettik tildi meńgertýdegi ozyq ádistemeler» taqyrybynda semınar ótti.
Semınar orys tilinde bilim beretin mektepterdegi «qazaq tili» pániniń muǵalimderine arnaldy. Oǵan «Til janashyry» qurmet belgisiniń ıegerleri, «Nazarbaev ortalyǵynyń» qyzmetkerleri, sondaı-aq Astana qalasy mektepteriniń orys synyptaryna qazaq tilinen sabaq beretin muǵalimder qatysty. Shara barysynda bıologııa ǵylymdarynyń kandıdaty, kásipker, «Sıtýatıvnyı kazahskıı» kitabynyń avtory Qanat Tasybekov baıandama jasap, qazaq tilin úırenýshilerge arnalǵan oqýlyqtardyń basty kemshiligi retinde olardaǵy mysaldardyń, dıalogtardyń ómirden alynbaı, oıdan shyǵarylatyndyǵyn synǵa aldy. «Bul jaǵdaıda mátinder men dıalogtar ómirden alynsa jaqsy bolar edi», - dep atap ótti ol. Sonymen qatar, semınarda S. Amanjolov atyndaǵy Shyǵys Qazaqstan memlekettik ýnıversıtetiniń professory, pedagogıka ǵylymdarynyń doktory Shynar Qurmanbaeva «Qazaq tiliniń ahýaldyq oqytý ádistemesi» taqyrybynda baıandama jasap, tildi qarym-qatynas barysynda úıretýdiń utymdylyǵyna toqtaldy. Esterińizge sala keteıik, atalǵan semınar erteń, ıaǵnı 7 qarashada elimizdiń túkpir-túkpirinde qazaq tiliniń damýyna eleýli úles qosyp, eńbek etip júrgen jandarǵa «Til janashyry» qurmet belgisin berý saltanaty aıasynda ótkizilip otyr.
