Astanada oryn alǵan iri kólik apatyna kran júrgizýshisi kináli bolýy múmkin – Astana qalalyq ІІD
ASTANA. QazAqparat - Búgin shamamen tańǵy 08.00 kezinde Astana men Aqmola oblysynyń Tselınograd aýdany, Qosshy eldi mekeni avtojolynyń 12-shi shaqyrymynda iri jol apaty oryn aldy. Onda №43 baǵyttaǵy jolaýshylar avtobýsy men júk kótergish kran mashınasy soqtyǵysqan.
Astana qalalyq ІІD baspasóz qyzmetiniń basshysy Sofıa Qylyshbekovanyń málimetinshe, avtobýstyń ishindegi 11 jolaýshy ártúrli dene jaraqatyn alǵan. Olardyń barlyǵy jedel járdemmen qala aýrýhanalaryna jetkizildi. Zardap shekkenderdiń arasynda 2007 jyly týylǵan bala bar, ol da balalar aýrýhanasyna jetkizildi.
«Aldyn ala boljam boıynsha, apatqa kran júrgizýshisi kináli. Ol ońǵa qaraı burylyp baryp, týra kele jatqan avtobýsty ótkizbeı, jolǵa shyǵyp ketken degen boljam bar», - deıdi S. Qylyshbekova.
