Astanada órtten kóz jumǵandardyń kóbi mas bolǵan – TJD
NUR-SULTAN. QazAqparat – Elordada jyl basynan beri órtten 12 adam kóz jumǵan. Onyń 10-y mas bolǵan. Bul týraly onlaın brıfıngte Nur-Sultan qalasynyń tótenshe jaǵdaılar departamenti apat qaýpin azaıtý men azamattyq qorǵanys salasyn baqylaý basqarmasynyń bastyǵy Erkin Otarǵalymuly málim etti, dep habarlaıdy QazAqparat tilshisi.
«Ot jaǵylatyn peshtiń durystyǵyn jıi tekserip, elektr jelilerine revızııa júrgizip otyrý kerek. Balalardy eshqashan qaraýsyz qaldyrmaı, úı otpen jylytylatyn jaǵdaıda abaı bolǵan durys», - dedi Erkin Otarǵalymuly.
Ol sonymen qatar jyl basynan beri 12 adam órtten kóz jumǵanyn, tilsiz jaý úıin jalmaǵan kezde onyń 10-y mas bolǵanyn habarlady.
«Bul rette árdaıym abaı bolý kerektigin esten shyǵarmaıyq. Sebebi shalys basqan ár qadam kisiniń ózine de, otbasy músheleri úshin de qaýipti», - deıdi ol.
Eske sala ketsek, buǵan deıin Erkin Otarǵalymuly elordalyqtarǵa peshtiń murjasy men qudyǵyn tekserip, tazalap qoıýdy eskertken bolatyn.
Onyń aıtýynsha, aýa raıy kúrt sýyǵan kezde peshti keıbir úıler shamasynan tys qyzdyryp jatady.
Osy rette montajdaý kezinde kemshilikke jol berilse, ol úıden órt shyǵý qaýpi óte joǵary.
