Astanada órtengen kóliktegi bala qutqaryldy
ASTANA. QazAqparat - Astanada sarbazdar órtengen kólikten balany qutqardy. Bul týraly Ulttyq gvardııanyń baspasóz qyzmeti málim etti, dep habarlaıdy QazAqparat.
Keshe saǵat 20:00 kezinde áskerı jasaq quramyndaǵy sarbazdar Altynsarın kóshesi boıynda sholǵyndaý kezinde «Volkswagen Passat» markaly avtokóliktiń órtenip jatqanyn kórip qalǵan.
Qatardaǵy jaýynger Temirlan Álimqulov bolǵan jaǵdaıdy dereý patrýldik toptyń basshysyna jáne áskerı jasaq boıynsha kezekshige habarlady. Sáıkesinshe, bul oqıǵa boıynsha órt sóndirý qyzmetine habar berildi.
«Órt sóndirý qyzmeti jetkenshe, jeke quram tilsiz jaýdy aýyzdyqtaýǵa kiristi. Anyqtalǵandaı, avtokólik ishinde kólik ıesiniń nemeresi bolǵan. Sarbazdar balany birinshi kezekte qutqaryp, qaýipsiz jerge alyp shyqty», - delingen taratylǵan málimette.
Balanyń týystary kórsetilgen kómek úshin Ulttyq gvardııa áskerı qyzmetshilerine rızashylyqtaryn bildirip, 5573 áskerı bóliminiń komandıri atyna alǵystaryn hat túrinde joldady.
