Astanada Ortalyq Azııadaǵy eń iri bilim kórmesi ashyldy
ASTANA. QazAqparat - Astanadaǵy «Rixos» qonaq úıinde «International Education Fair 2018» Halyqaralyq bilim kórmesi ashyldy. Atalǵan shara Ortalyq Azııa aımaǵynda eń iri bilim kórmesi bolyp sanalady, dep xabarlaıdy QazAqparat tilshisi.
Bıylǵy kórmege 100-ge jýyq otandyq jáne sheteldik joǵary oqý oryndary, til úıretý mektepteri men bilim agenttikteri qatysýda. Joǵary oqý oryndary ishinde Herit-Watt University, University of Glasgow, City University London, University of Manchester, Riga Technical University, University of Latvia, Istanbul Aidyn University, Michigan State University, Ankara University, Oregon State University, Columbia University, New York Film Academy, University of California, The George Washington University, Bozok University, Bremen Universities, Shanghai International Studies University, University of Nicosia, Universite Sorbonne, Giresun University jáne taǵy basqa álemge tanymal ýnıversıtter bar.
Kórmeniń negizgi maqsaty - bilim salasyndaǵy xalyqaralyq yntymaqtastyqty arttyrý, sheteldegi stıpendııalyq baǵdarlamalar jaıynda xabar taratý, sondaı-aq bilim berý salasyndaǵy jobalar boıynsha ózara tájirıbe almasý. Osyǵan oraı, otandyq jáne sheteldik bilim berý mekemeleri arasynda B2B-kezdesýler uıymdastyrylady. Budan bólek, stýdent almasý, bilim berý baǵdarlamalaryn damytý jáne qos dıplom boıynsha kelisimsharttar rásimdeledi degen jospar bar. Al ýnıversıtet stýdentteri men magıstranttary sheteldegi oqý baǵdarlamalary týraly jan-jaqty aqparat ala alady. Búgin kórme keshki saǵat 18:00-ge deıin jumys isteıdi. Kórme jumysy erteń de jalǵasada. 
Aıta keteıik, kórmeniń saltanatty ashylý saltanatyna QR Bilim jáne ǵylym mınıstri Erlan Saǵadıev, Vengrııa men Frantsııa elshileri qatysty. Sol jerde Frantsııa Elshisi Fılıpp Martıne «Abaı-Vern» atty jańa stıpendııalyq baǵdarlamanyń bastalǵanyn aıtty. 
