Astanada Ortalyq Azııa elderiniń halyqaralyq bı festıvali bastaldy
ASTANA. QazAqparat - Búgin Astanada Ortalyq Azııada alǵash ret uıymdastyrylyp otyrǵan «CENTRAL ASIAN DANCE FESTIVAL» halyqaralyq bı festıvali saltanatty túrde ashyldy, dep habarlaıdy QazAqparat tilshisi.
Elordada alǵash ret ótip jatqan festıvalge Qazaqstan, Túrikmenstan, Tájikstan, Qyrǵyzstan jáne Ózbekstan eliniń talantty bıshileri men horeograftary jınaldy. Festıval barysynda AQSh-tan arnaıy shaqyrylǵan Ketrın Pılkıngton, Tara Kompton syndy áıgili horeograftar eki aptalyq sheberlik sabaqtaryn júrgizedi. Horeografııanyń aldyńǵy qatarly sheberleri qatysýshylarǵa neoklassıkalyq balet, kontemporarı, modern, brodveı, djaz, hıp-hop, sonymen qatar horeografııanyń foto-vıdeo túsirilimi men art- menedjment taqyryptaryna arnaıy skıll-ap ótkizedi.
Shara QR Mádenıet jáne sport mınıstrliginiń, Astana qalasy ákimdiginiń qoldaýymen, Astana qalasy Qazaq Ulttyq horeografııa akademııasy men AQSh-tyń Qazaqstandaǵy elshiliginiń uıymdastyrýymen ótýde.
Uıymdastyrýshylardyń aıtýynsha, Qazaqstandaǵy AQSh elshiligi Astana qalasyna 30 grant, aımaqtarǵa - 50 jáne Ortalyq Azııaǵa 20 grant bólip, jastarda aıtýly sharaǵa tegin qatysýǵa múmkindik berdi.
Sonymen qatar, búgingi tanda kez-kelgen bıznestiń mańyzdy bóligi - marketıng pen baılanys salalarynda keń daǵdyǵa ıe bolyp, zamanaýı sandyq óner men kıno, fotosýret baǵyttaryndaǵy qajetti quraldardy meńgeredi.
«Sharanyń tuńǵysh ret bizde uıymdastyrylýynyń ózi kóp nárseni ańǵartady. Negizgi maqsatamyz Qazaqstandy, jas Astanamyzdy qazir álemdi jaýlaǵan zamanaýı bıdiń ortalyǵy etý. Eki apta boıy Ortalyq Azııa elderinen kelgen qatysýshylar Qazaq Ulttyq horeografııa akademııasynda AQSh-tan arnaıy shaqyrtylǵan mamandardyń sheberlik sabaqtaryna qatysyp, óz deńgeılerin odan ári shynyqtaı túsedi. Festıvalde bıdiń barlyq túri qarastyrylǵan, ıaǵnı hıp-hop, modern, kontemp, brodveı taǵy basqa. Іriktelip alynǵan 100 qatysýshy eki aptada alǵan sheberlik sabaqtarynyń qorytyndysy retinde 5 tamyz kúni «Óner zorlyq-zombylyqqa qarsy» atty gala-kontsert qoıamyz. Bizdiń festıvaldiń ereksheligi - oǵan tek kásibı bıshiler qatysýda», - dedi Central Asian Dance festıvaliniń uıymdastyrýshysy Mereı Zeınesh.
Eki aptalyq shara jastardyń ózara mádenı jáne kásibı tájirıbe almasýyna negiz bolyp, Ortalyq Azııa aýmaǵynda neoklassıkalyq jáne zamanaýı horeografııanyń damýyna úlesin qosady dep kútilýde.
