Astanada Ortalyq Azııadaǵy Tszıansý provıntsııasynyń ortalyǵy ashyldy
ASTANA. KAZINFORM – Astanada Qazaqstan men Qytaıdyń memlekettik organdary men bıznes qaýymdastyǵy ókilderiniń qatysýymen «Qytaı (Tszıansý provıntsııasy) — Qazaqstan» saýda-ekonomıkalyq yntymaqtastyq forýmy ótti.
Іs-shara eki el arasyndaǵy strategııalyq áriptestikti odan ári nyǵaıtýǵa baǵyttalǵan mańyzdy dıalog alańyna aınaldy.
Forým aıasynda Qazaqstan Respýblıkasynyń Saýda jáne ıntegratsııa mınıstri Arman Shaqqalıev pen Qytaı Halyq Respýblıkasynyń Tszıansý provıntsııasy partııa komıtetiniń hatshysy Sın Chjansın ınvestıtsııalyq yntymaqtastyqtyń keleshegin talqylap, Ortalyq Azııadaǵy Tszıansý provıntsııasy ortalyǵynyń ashylǵanyn resmı túrde jarııalady.
Búginde Qazaqstan men Qytaı arasyndaǵy qarym-qatynas buryn-sońdy bolmaǵan joǵary deńgeıge kóterildi. Memleketter basshylary aıqyndaǵan strategııalyq baǵyttyń nátıjesinde Qytaı Qazaqstannyń negizgi saýda seriktesteriniń biri retinde óz ornyn nyǵaıtyp keledi. Ótken jyldyń qorytyndysy boıynsha ekijaqty taýar aınalymy rekordtyq kórsetkishke jetip, 49 mlrd AQSh dollaryn qurady.
Sonymen qatar Qazaqstan Qytaıdyń Ortalyq Azııadaǵy basty ekonomıkalyq seriktesi sanalady. Qazirgi tańda Qytaıdyń óńir elderimen jalpy saýda kóleminiń shamamen 60 paıyzy Qazaqstannyń úlesine tıesili.
— Memleketterimiz basshylarynyń strategııalyq kózqarasy men ózara senimge negizdelgen saıasatynyń arqasynda Qazaqstan men Qytaı arasyndaǵy yntymaqtastyq turaqty ekonomıkalyq ósimniń jáne óńirlik ózara baılanystardy damytýdyń mańyzdy faktory bolyp otyr. Búginde biz Tszıansý provıntsııasynyń kásipkerlerin ónerkásip, agroónerkásiptik óńdeý, munaı-gaz hımııasy jáne tsıfrlyq tehnologııalar salalaryndaǵy birlesken jobalardy iske asyrýǵa shaqyramyz. Astanadaǵy Tszıansý ortalyǵynyń ashylýy ózara tıimdi seriktestiktiń zańdy jalǵasy ári jańa óndiristik tizbekterdi qalyptastyrýdyń tıimdi quraly bolady dep senemin, — dedi forým barysynda QR Saýda jáne ıntegratsııa mınıstri Arman Shaqqalıev.
Forýmda qazaqstandyq tarap elimizdiń ınvestıtsııalyq múmkindikterin tanystyryp, Tszıansý provıntsııasynyń kompanııalaryn jańartylatyn energııa kózderi, elektrondyq saýda jáne kólik-logıstıka salalaryndaǵy birlesken jobalardy júzege asyrýǵa shaqyrdy.
Іs-sharanyń mańyzdy nátıjeleriniń biri logıstıka salasyndaǵy yntymaqtastyqty keńeıtý týraly kelisim boldy. Atap aıtqanda, Aqtaý portynda jańa konteınerlik jobany iske asyrý josparlanýda. Bul joba «esikten shekaraǵa deıin» qaǵıdaty boıynsha qurylatyn biryńǵaı logıstıkalyq tizbektiń quramdas bóligine aınalady.
Sondaı-aq taraptar Qazaqstan eksportynyń qurylymyn ártaraptandyrý jóninde ýaǵdalasty. Aldaǵy kezeńde Tszıansý provıntsııasyna qazaqstandyq bıdaı, et jáne bal ónimderin jetkizý kólemin ulǵaıtý kózdelip otyr.
Forým barysynda álemdegi jetekshi ındýstrııalyq óńirlerdiń biri sanalatyn Tszıansý provıntsııasynyń áleýetine erekshe nazar aýdaryldy. Onyń ónerkásiptik óndiris kólemi álemdik óndiristiń shamamen 4 paıyzyn quraıdy. Qazirgi ýaqytta Tszıansý kompanııalary Qazaqstanda 63 ınvestıtsııalyq jobany júzege asyryp jatyr. Bul kórsetkish provıntsııanyń Ortalyq Azııa elderine salǵan ınvestıtsııalarynyń jalpy kóleminiń 47 paıyzyna teń.
— Qytaı men Qazaqstan — ortaq bolashaqqa umtylǵan jaqyn dostar ári senimdi seriktester. Eki el arasynda biregeı strategııalyq áriptestik qalyptasqan. Ekonomıkalarymyz birin-biri tolyqtyryp otyr, sondyqtan ózara saýda kólemin eki esege arttyrýǵa tolyq múmkindik bar dep esepteımin. Biz jasandy ıntellekt, jasyl ekonomıka jáne elektrondyq kommertsııa sııaqty jańa baǵyttar boıynsha yntymaqtastyqty damytýǵa jáne ekijaqty ınvestıtsııalar úshin qolaıly jaǵdaı jasaýǵa nıettimiz, — dedi Tszıansý provıntsııasy partııa komıtetiniń hatshysy Sın Chjansın.
Astanada ashylǵan Ortalyq Azııadaǵy Tszıansý ortalyǵy qytaılyq kompanııalarǵa arnalǵan biryńǵaı servıstik hab qyzmetin atqarady. Ortalyq konsaltıngtik qoldaý kórsetip, kórme qyzmetin uıymdastyrýǵa jáne «Jibek joly» elektrondyq kommertsııasyn damytýǵa járdemdesedi.
Forým qorytyndysy boıynsha taraptar ınvestıtsııalyq yntymaqtastyqty odan ári damytýǵa, birlesken óndirister qurýǵa jáne saýda-ekonomıkalyq baılanystardy keńeıtýge ózara múddeli ekenin rastady.
