Astanada Ortalyq Azııadaǵy eń iri jabyq attraktsıon parki ashylmaq
ASTANA. KAZINFORM – Astanada aýmaǵy 10 myń sharshy metr bolatyn zamanaýı jabyq Ailand attraktsıon parkin iske qosý josparlanyp otyr. Bul týraly Astana qalasynyń Investıtsııalar jáne kásipkerlikti damytý basqarmasynyń basshysy Halel Ákimjanov málimdedi.
Ol elordalyq máslıhatta ótken qoǵamdyq tyńdaýda Astananyń týrızm salasyndaǵy qazirgi kórsetkishteri men aldaǵy josparlaryna toqtaldy.
Halel Ákimjanovtyń aıtýynsha, 2026 jyldyń birinshi jartyjyldyǵynda elordaǵa 830 myń týrıst kelgen. Bul ótken jyldyń sáıkes kezeńimen salystyrǵanda 12% kóp. Qazir qalada 100-den astam týrıstik nysan men 340 qonaqúı bar. Ekskýrsııalyq qyzmetti 140-tan astam kásibı gıd kórsetedi.
– Jaqyn arada aýmaǵy 10 myń sharshy metr bolatyn zamanaýı jabyq Ailand attraktsıon parkin iske qosý josparlanyp otyr. Jańa nysandar ekskýrsııalyq baǵyttardy keńeıtip, qala qonaqtaryna elordamen tanysýdyń jańa múmkindikterin usynady, – dedi basqarma basshysy.
Sonymen qatar qonaqúı ınfraqurylymyn damytý úshin ınvestorlarmen birqatar joba pysyqtalyp jatyr. Basqarma basshysy elordany sheteldik týrısterge tanytý baǵytynda da jumys júrgizilip jatqanyn aıtty.
Budan bólek, bıyl maýsym aıynan bastap Astananyń 2026–2031 jyldarǵa arnalǵan týrızmdi damytý strategııasy ázirlenip jatyr. Onyń negizgi maqsaty – týrıster sanyn kóbeıtý, olardyń qalada bolý merzimin uzartý jáne týrıstik shyǵyn kólemin arttyrý.
Strategııany ázirleý tórt kezeńnen turady. Osy ýaqytqa deıin Astanamen salystyrýǵa keletin segiz qalaǵa taldaý jasalyp, sheteldik alty basym naryq zerttelgen. Sondaı-aq 9 myńǵa jýyq týrıst arasynda júrgizilgen saýalnama nátıjeleri saralanǵan.
Onyń aıtýynsha, qazir týrıstik aǵynnyń naqty kólemi men onyń qala ekonomıkasyna qosatyn úlesi baǵalanyp jatyr. 12 tamyzda sarapshylar, týrıstik bıznes ókilderi jáne máslıhat depýtattarynyń qatysýymen strategııalyq sessııa ótken.
– Onda týrızm salasyn odan ári damytý jáne Astanany týrıstik baǵyt retinde tanytý máseleleri talqylandy. Qazir strategııany ázirleýdiń úshinshi kezeńine kóshtik. Bul kezeńde ınfraqurylymdy damytý, qyzmet kórsetý sapasyn arttyrý, elordany tanytý jáne týrızmniń basym baǵyttary boıynsha bastamalar ázirlenedi. Qorytyndy kezeńde jol kartasy, master-jospar jáne negizgi tıimdilik kórsetkishteri júıesi daıyndalady. Strategııany ázirleý jumystaryn bıyl qarasha aıynda aıaqtaýdy josparlap otyrmyz. Odan keıin qujat Astana qalasy máslıhatynyń qaraýyna usynylady, – dedi Halel Ákimjanov.
Buǵan deıin Astanada batpaqty jerdiń ornyna 4 mlrd teńgege ekosaıabaq salynǵanyn jazdyq.
