Astanada Ortalyq Azııa elderiniń Bala quqyqtary jónindegi ýákilderiniń II halyqaralyq forýmy ótedi
ASTANA. KAZINFORM — Balalardyń quqyqtaryn qorǵaý salasyndaǵy halyqaralyq jáne óńirlik yntymaqtastyqty nyǵaıtý maqsatynda Qazaqstan Respýblıkasyndaǵy Bala quqyqtary jónindegi ýákil BUU Balalar qorynyń (ıÝNISEF) Qazaqstandaǵy ókildiginiń qoldaýymen «Balalar úni: ulttyq strategııalar jáne qaýipsiz tsıfrlyq orta» taqyrybynda Ortalyq Azııa elderiniń Bala quqyqtary jónindegi ýákilderiniń ІІ halyqaralyq forýmyn ótkizedi.
Forýmnyń maqsaty — halyqaralyq jáne óńirlik tájirıbe almasý, bala quqyqtaryn qorǵaý salasynda qol jetken nátıjelerdi talqylaý, elder arasyndaǵy yntymaqtastyqty damytý jáne balalardy qorǵaýdyń ulttyq júıelerin nyǵaıtý baǵytyndaǵy aldaǵy qadamdardy aıqyndaý.
Forým 2026 jylǵy 27 qazanda Astana qalasyndaǵy Alem.AI halyqaralyq jasandy ıntellekt ortalyǵynda ótedi.
Forým aıasynda balalardyń quqyqtaryn qorǵaý jáne olardyń ál-aýqatyn qamtamasyz etýdiń ózekti máselelerine arnalǵan eki paneldik sessııa ótkizý josparlanǵan:
- «Balalardy tsıfrlyq ortada qorǵaý jáne psıhologııalyq ál-aýqat»;
- «Inklıýzıvti ortany damytý jáne barlyq balaǵa birdeı múmkindik berý».
Іs-sharaǵa Birikken Ulttar Uıymy Bas hatshysynyń Arnaıy ókili doktor Nadjat Maalla M’jıd, Ortalyq Azııa elderiniń, sondaı-aq Japonııa men Fınlıandııanyń bala quqyqtary jónindegi ýákilderi jáne Qytaı Halyq Respýblıkasynyń balalardyń quqyqtaryn qorǵaý jónindegi organynyń basshylyǵy qatysady.
28–29 qazanda Forým aıasynda balalarmen jáne memlekettik organdardyń ókilderimen kezdesýler ótedi. Qatysýshylar sondaı-aq bala quqyqtaryn qamtamasyz etý jáne qorǵaý salasynda qyzmet atqaratyn uıymdar men mekemelerdiń jumysymen tanysady. Bul is-sharalar qatysýshylarǵa praktıkalyq tájirıbe almasýǵa, balalardy qorǵaý mehanızmderin jetildirýdiń ózekti máseleleri men tásilderin talqylaýǵa, sondaı-aq beıindi vedomstvolar men uıymdar arasyndaǵy ózara is-qımyldy nyǵaıtýǵa múmkindik bermek.
Forým ashyq kásibı dıalog júrgizýge, ozyq tájirıbe almasýǵa jáne balalardyń quqyqtaryn qorǵaýdyń ózekti máselelerin sheshýdiń birlesken tásilderin ázirleýge arnalǵan alań bolady. Atap aıtqanda, tsıfrlyq ortadaǵy qaýipsizdikti qamtamasyz etý, psıhologııalyq ál-aýqatty qoldaý jáne barlyq balaǵa birdeı múmkindik berý máselelerine erekshe nazar aýdarylady.
